مەحما خەلیل: "شنگال لە دۆخێکى خراپدایە"
- قایمقامى قەزاى شنگال، مەحما خەلیل: "پەکەکە ئەگەر هەموو رۆژێک کەسێک وەک قایمقامى قەزاى شنگال دەستنیشان بکات، نە ئیدارەى قەزاى شنگال نە ئیدارەى پارێزگاى نەینەوا دان بە ئیدارەکە دانانێت".
Arbil
هەولێر - AA
قایمقامى قەزاى شنگال، مەحما خەلیل رایگەیاند "سەرجەم جومگەکانى ژیان لە قەزای شنگال لە دۆخێکى تەواو ناجێگیردایە".
مەحما خەلیل لە لێدوانێکى بۆ ئاژانسى ئانادۆڵو گوتى: "ئەگەر پەکەکە هەموو رۆژێک کەسێک وەک قایمقامى قەزاى شنگال دەستنیشان بکات، بەردەوام بێت لە گۆڕینى کەسەکان لە قایمقامى سەربازى بۆ ئیدارى یان سیاسى، ئیدارەى قەزاى شنگال و ئیدارەى پارێزگاى نەینەوا دان بەو ئیدارەیە نانێت کە لە لایەن پەکەکەوە دروستکرابێت، بە توندترین شێوە ئەو جۆرە دەستوەردانە رەتدەکەینەوە".
گوتیشى: "پەکەکە ناتوانێت شنگال بەڕێوەببات، لەبەر ئەوەى خەڵکى ناوچەکە و تەواوى یەکە ئیدارییەکانى قەزاکە دژ بە بوونى پەکەکەن لە شنگال، هەر بەهۆى بوونى پەکەکە و حەشدى شەعبى بووە کە خەڵک ئاوارە بوون. ئەگەر پەکەکە و حەشدى شەعبى بانگەشەى ئەوە دەکەن ئەوان لەسەر داواکارى خەڵکى شنگال لە ناوچەکەن، ئەى بۆ خەڵک ناگەڕێتەوە ژێر دەسەڵاتى ئەوان بۆ لە ئاوارەییدا ژیان بەسەر دەبەن؟".
مەحما خەلیل دەڵێت "پەکەکە و حەشدى شەعبى لە شنگال هەموو جۆرە رێککەوتنێک لە نێوانیاندا هەیە و لە ئێستادا رێگرى دەکەن لەوەى هاوکارى مرۆیی بگەیەنرێتە ئەو خەڵکەى لە ناوچەکە گیریانخواردووە، بوونى ئەو گرووپە چەکدارانە بەجۆرێک کاریگەرى نەرێنى هەبووە کە لە ئێستاد رێژەى بێکارى لە ئاستێکى مەترسیداردایە و هاووڵاتییان ناتوانن بژێوى رۆژانەیان بەدەستبهێنن".
قایمقامى قەزاى شنگال دەڵێت "ئەگەر پەکەکە و حەشدى شەعبى لە ناوچەکە بمێننەوە سەرهەڵدانى برسییەتى لە سنوورى شنگال ئەگەرێکى چاوەڕوانکراوە، چونکە خێزانى وا هەیە لەو خەڵکەى لە شنگال ماون تەنانەت بڕە پارەى کڕینى یەک کیلۆگرام تەماتەیان نەماوە".