نێچیرڤان بارزانی و یان کۆبیش کۆبوونەوە
لە دیدارێکی نێوان سەرۆکوەزیرانی ھەرێمی کوردستان، نێچیرڤان بارزانی و نێردەی تایبەتیی نەتەوە یەکگرتووەکان بۆ عێراق یان کۆبیش جەخت لەسەر پێویستیی گفتوگۆی نێوان ھەولێر و بەغدا کراوەتەوە.
Arbil
هەولێر - AA
سەرۆکوەزیرانی ھەرێمی کوردستان، نێچیرڤان بارزانی، پێشوازی لە نێردەی تایبەتیی نەتەوە یەکگرتووەکان بۆ عێراق یان کۆبیش و شاندێکی یاوەری کرد.
بەپێی هەواڵێکی ماڵپەڕی فەرمیی حکوومەتی هەرێمی کوردستان، لە دیدارێکدا کە جێگری سەرۆکوەزیرانی ھەرێمی کوردستان، قوباد تاڵەبانی ئامادەی بووە، ھەردوولا گفتوگۆیەکی تێروتەسەلیان لەسەر دوا پێشھاتەکانی ناوچەکە بەگشتی و دۆخی پەیوەندییەکانی نێوان ھەولێر و بەغدا بەتایبەتی، کردووە.
سەرۆکوەزیرانی ھەرێمی کوردستان و نێردەی تایبەتی نەتەوە یەکگرتووەکان بۆ عێراق، جەختیان لەسەر پێویستیی گفتوگۆی نێوان ھەولێر و بەغدا لەسەر ھەردوو ئاستی تەکنیکی و سیاسی بەمەبەستی چارەسەرکردنی کێشەکان، کردووەتەوە.
لەبەشێکی دیکەی هەواڵەکەدا هاتووە کە سەرۆکوەزیرانی ھەرێمی کوردستان، رۆڵی نەتەوە یەکگرتووەکانی بۆ زەمینەخۆشکردن بەمەبەستی دەستپێکردنی گفتوگۆی نێوان ھەولێر و بەغدا، دووپات کردووەتەوە.