هونەر و كلتوور

مێژووی كتێبخانەی خانەقای بیارە بۆ 131 ساڵ دەگەڕێتەوە

كتێبخانەی خانەقای بیارە كە مێژووی دامەزراندنی بۆ سەردەمی دامەزراندنی خانەقاكە پێش 131 ساڵ دەگەڕێتەوە، زیاتر لە 500 ناونیشانی كتێبی دەگمەن و جۆراوجۆری تێدایە كە ژمارەیەكیان هی سەد ساڵ پێش ئێستان بەڵام بەهۆی خزمەت نەكردن و پارێزگاری نەكردنیان بەشێكیان خەریکە تێدا دەچێت.

Salim hemexan  | 24.05.2016 - نوێکردنەوە : 25.05.2016
   مێژووی كتێبخانەی خانەقای بیارە بۆ 131 ساڵ دەگەڕێتەوە

هەورامان
بەڕێوەبەری مەدرەسە و خانەقای بیارەی شەریفە فاخر شەقلاوەیی لە لێدوانێكدا بۆئاژانسی ئەنادۆڵۆ رایگەیاند: "كتێبخانەی مەدرەسە و خانەقای بیارە پاش ساڵی دامەزراندنی خانەقاوە لەساڵی 1307ی كۆچی (1885ی میلادی) دامەزراوە، دوای دامەزراندنی لە چەندەها شوێنەوە بەدیاری كتێبیان بۆ ناردووە، یەكێكە لەو شوێنانە كە بە‌ وتەی مامۆستایانی پێش ئێمە كە لە خزمەتیاندا بووین، لە مەدینەی منەوەرەوە گوتاربێژی ئەوێ كتێبی بەدیاری ناردووە بۆ خانەقای بیارە. لە ئێرانیشەوە چەندین جار كتێبی بۆ هاتووە. لە توركیا و ناوخۆی كوردستانیشەوە كتێبی جۆراوجۆری بۆ نێردراوە، ئەمەش بۆ زیندووهێشتنەوەی مەدرەسەكە و دەوڵەمەندكردنی كتێبخانەكەی بووە".
خانەقای بیارە مێژوویەكی دێرینی هەیە لە پێگەیاندنی مامۆستایانی ئاینی و چەندین زانای ناودار لەو خانەقایەدا خزمەتیان كردووە، خانەقاكە دەكەوێتە ناحیەی خانەقا لە ناوچەی هەورامانی سەر بە پارێزگای هەڵەبجە بە دووری 98 كلم لە باكووری رۆژهەڵاتی سلێمانی.
فاخر شەقلاوەیی گوتیشی: "تەواوی ئەو كتێب و دەستنووسانەی لەم كتێبخانەیەدا بوو پارێزراو بوون، تا لەماوەی چەند ساڵی رابردوودا بەهۆی ئەو بارودۆخە نەخوازراوانەی روویان لە ناوچەكە كرد. پاراستنی دەستخەتەكان كارێكی ئەستەم بوو. بۆیە بنەماڵەی شێخانی سیراجەددین نەقشبەندی، بەپێویستیان زانی كتێبە دەستخەتەكان، ببەنە كتێبخانەی ئەوقافی سلێمانی".
بەڕێوەبەری مەدرەسە و خانەقای بیارە زیاتر دوا و گوتی: "ئەو كتێبانەی ئێستا لای ئێمە ماون، مێژوویان كۆنە و زۆریان دەگەڕێنەوە بۆ 50 ساڵ پێش ئێستا و ژمارەیەكیشیان بۆ زیاتر لە سەد ساڵ پێش ئێستا دەگەڕێنەوە كە هەموویان مۆری حەزرەتی شێخ عومەر زیائەددینیان لەسەرە و وەقفی كتێبخانەی خانەقای بیارەن كە بەژمارە زیاتر لە 500 ناونیشانی كتێب لە كتێبخانەكەدا هەیە و دەكاتە زیاتر لە 2000 كتێبی جۆراوجۆر، زۆرینەیان بە زمانی عەرەبی و بەشێكیشیان توركی و فارسی و كوردین".
شەقلاوەیی بەنیگەرانییەوە دەربارەی شێوازی هەڵگرتن و پاراستنی كتێبەكان گوتی: "بەداخەوە وەكو پێویست گرنگی بەمەدرەسە و خانەقای بیارە بەگشتیی نەدراوە و كتێبخانەكەشی بەهەمان شێوە پشتگوێ خراوە. وەزارەتی ئەوقاف دان بەبڕوانامەی مامۆستایانمان دانانێت. كتێبخانەكەشمان بەو هەموو سەرچاوە و كتێبە دەگمەنانەوە، تەنها وەك كتێبخانەیەكی ئاسایی دەتوانین خزمەتی بكەین و هیچ رێوشوێنێكی ئەوتۆ بۆپارێزگاریكردن لە كتێبەكان نەگیراوەتەبەر چونكە بەشێكی زۆری كتێبەكان بەرەو دڕان و لەناوچوون دەچن، ئەوەش لە ئەنجامی بەكارهێنان و خوێندنەوە و سوود لێوەرگرتنیان لەلایەن فەقێیانی مەدرەسەكەمان كە وەك سەرچاوەی شەرعی سوودیان لێوەر دەگرن كە بەردەوام 65 بۆ70 فەقێ لەمەدرەسەكەماندا دەخوێنن".
بۆ خوێندنەوەی درێژەی ئەم هەواڵە و هەواڵەکانی دیکەی ئاژانسی ئانادۆڵو، ببە بە ئابۆنەی ئاژانسی ئانادۆڵو و کلیک لەسەر ئەم بەستەرە بکەن
بابه‌ته‌ په‌یوه‌ندیداره‌كان
Bu haberi paylaşın