سەرۆکی هەرێمی کوردستان پیرۆزبایی لە ئێزدییەکان دەکات
سەرۆکی هەرێمی کوردستان، مەسعود بارزانی: "کوردانی ئێزیدی بەشێکی ئازیز و دانەبڕاوی گەلی کوردستانن. خۆشی و نەھامەتییەکانی ئەوان خۆشی و نەھامەتیی گەلی کوردستانە".
Arbil
هەولێر-AA
بەبۆنەی جهژنی سهری ساڵی ئێزیدی"جهژنی چارشهمبا سۆر" سەرۆکی هەرێمی کوردستان، مەسعود بارزانی لە پەیامێکدا پیرۆزبایی لە ئێزدییەکان دەکات و تێیدا ئاماژە بەوە دەکات کە کوردانی ئێزدییەکان بەشێکی دانەبڕاوی گەلی کوردستانن.
پەیامەکەی بارزانی کە لە ماڵپەڕی فەرمی سەرۆکایەتی هەرێمی کوردستان بڵاوکراوەتەوە و رایگەیاندووە کە "بە درێژایی مێژوو ئێزدییەکان بەھۆی ناسنامەی ئایینی و نەتەوەییان تووشی کارەسات ھاتوونە، بەڵام پابەندبوونیان بە ناسنامەی کوردایەتی و ئاینییان ھەموو پیلان و ستەمێکی لەدژی ئەوان پووچەڵ کردووەتەوە".
دەقی پەیامەکەی سەرۆکی هەرێمی کوردستان
بەبۆنەی ھاتنەوەی جەژنی سەری ساڵی ئێزیدی، جەژنی چارشەمبا سۆر، پیرۆزباییەکی گەرم لە سەرجەم خوشک و برایانی کوردی ئێزیدی لە کوردستان و جیھان دەکەم.
کوردانی ئێزیدی بەشێکی ئازیز و دانەبڕاوی گەلی کوردستانن. خۆشی و نەھامەتییەکانی ئەوان خۆشی و نەھامەتیی گەلی کوردستانە. بە درێژایی مێژوو خوشک و برا ئێزیدییەکانمان بەھۆی ناسنامەی ئایینی و نەتەوەییان تووشی کارەسات ھاتوونە، بەڵام پابەندبوونیان بە ناسنامەی کوردایەتی و ئاینییان ھەموو پیلان و ستەمێکی لەدژی ئەوان پووچەڵ کردووەتەوە.
سوپاس بۆ خودا بە گیانفیدایی پێشمەرگە تیرۆریستانی داعش تێکشکێندران و داعش باجی تاوانەکانیدا و سەری کەوتە ژێر پێی ئێزیدییەکان و چیتر نابێ رێگە بدرێت ھیچ کارەسات و نەھامەتییەکی تر دەرھەق خوشک و برا ئێزیدییەکانمان دووبارە ببێتەوە.
لە جەژنی سەری ساڵی ئێزدیدا ئەوە دووپات دەکەینەوە کە گەلی کوردستان پاڵپشتی ئێزیدییەکانە و رێگەیش نادرێت ھیچ لایەنێک خۆی بەسەریاندا بسەپێنێت و بڕیاردان لە چارەنووس و داھاتوویان تەنیا لە دەستی خودی ئێزیدییەکاندا دەبێت.
مسعود بارزانی
18ـی 4ـی 2017