Parlamenti i Greqisë miraton masat e reja shtrënguese, protestuesit sulmojnë me koktej molotovi
Një grup i maskuar sulmoi policët me koktej molotovi dhe u përpoq të hyjë në kuvend, me ç'rast ndodhi përplasje mes protestuesve dhe policëve
Athinë
ATHINË (AA) - Parlamenti i Greqisë ka miratuar paketën e re ligjore që përmban masa shtrënguese shtesë në kuadër të programit të tretë të shpëtimit, raporton Anadolu Agency (AA).
Në votimin që u realizua në orët e vona të së enjtes pas debateve që zgjatën dy ditë në parlamentin grek, paketa ligjore u pranua me votat e partnerëve të koalicionit qeveritar, SYRIZA dhe Grekët e Pavarur.
Nga 300 deputetë në parlamentin grek, 281 shfrytëzuan të drejtën e votës, prej të cilëve 153 votuan në favor të paketës, kurse 128 deputetë kundër.
Teksa bisedimet në kuvend vazhdonin, kundër reformave të reja u organizuan protesta të kryesuara nga Federate Greke e Punonjësve të Sektorit Publik, Konfederata e Përgjithshme e Sindikatave të Punëtorëve dhe Unioni i Degëve të Punëtorëve Luftues.
Gjatë protestës, një grup i maskuar sulmoi policët me koktej molotovi dhe u përpoq të hyjë në kuvend, me ç'rast ndodhi përplasje mes protestuesve dhe policëve.
Ndryshe, marrëveshja të cilën qeveria greke e ka arritur me kreditorët për lëshimin e pjesës së re të kredisë në kuadër të programit të shpëtimit, parasheh të arrihet kursim prej 4,9 miliardë eurosh duke zvogëluar pensionet dhe pragun e lirimit nga tatimet në periudhën 2019-2020.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.