میری ئێزديیان: "ھێشتا فەرمان لەسەر ئێزدییەکان بەردەوامە"

ھەولێر ــ AA

میری ئێزدییان، میر حازم تەحسین بەگ رایگەیاند کە تا ئێستا کۆمەڵگای نێودەوڵەتیی، بەڵێنەکانی خۆی لەبارەی بەجینۆساید ناساندنی کارەساتی کۆمەڵکوژیی ئێزدییەکان لەلایەن تیرۆریستانی داعشەوە، جێبەجێ نەکردووە و گوتی: "تا ئێستا فەرمان لەسەر ئێزدییەکان بەردەوامە".

میری حازم تەحسین بەگ لە لێدوانێکدا بۆ ئاژانسی ئانادۆڵو گوتی: "ئاوەدانکردنەوەی شنگال و قەرەبووکردنەوەی خەڵکەکەی، ئاشکراکردنی چارەنووسی سێ ھەزار خوشک و کەسی ئێمە، ھەڵدانەوەی گۆڕە بەکۆمەڵەکان، ھەروەھا ھەوڵدان بۆ بەجینۆساید ناساندنی ئەو کارەساتەی بەسەر ئێمەدا ھاتووە، ئەو بەڵێنانەن کە پێشتر حکومەتی عێراق و کۆمەڵگای نێودەوڵەتی بە ئیمەیان داوە، بەڵام بە داخەوە تا ئیستا ھیچ کام لەو بەڵێنانە جێبەجێ نەکراون".

گوتیشی: "ھێشتا رێکخراوی تیرۆیستیی داعش ماوە و سەرەڕای ئەوەیش، ھەشت ساڵە خەڵکی ئێمە لە کەمپەکاندا دەژین و خەڵکی ئێمە ئاوارە و پەرتەوازەبوونە، جگە لەوەیش تا ئێستا فەرمان لەسەر ئێزدییەکان بەردەوامە".

میر حازم تەحسین بەگ، داوایشی لە کۆمەڵگای نێودەوڵەتیی، حکوومەتی عێراق و حکوومەتی ھەرێمی کوردستان کرد، کێشەی شنگال و دانیشتووانەکەی چارەسەر بکەن.

رۆژی سێی ئابی ٢٠١٤، تیرۆریستانی داعش پەلاماری قەزای شنگال رۆژئاوای پارێزگای نەینەوایان دا و بەھۆیەوە ژمارەیەکی زۆری کوردی ئێزدی کوژران و برینداربوون، ھەروەھا ژمارەیەکی زۆری دیکەیش ئاوارەبوون، ئەمە وێڕای ئەوەی سەدانی دیکەیش رفێندران کە تا ئێستا چارەنووسی ژمارەیەکی زۆریان نادیارە.