Ukrainë, në Çernobil regjistrohet nivel ekstrem i radioaktivitetit

Nivele ekstreme të radioaktivitetit janë regjistruar në termocentralin bërthamor të Çernobilit, kontrollin e të cilit e kanë marrë forcat ruse nga Ukraina, njoftoi Zyra e Rregullatorit Bërthamor të Ukrainës, transmeton Anadolu Agency (AA).

Institucioni në një deklaratë në faqen e internetit thekson se doza e rrezatimit kishte tejkaluar nivelet e kontrollit.

Më tej thuhet se rritja mund të jetë për shkak të lëvizjes së armëve të rënda ushtarake dhe hedhjes së pluhurit radioaktiv në ajër.

Mikhail Podolyak, nënkryetari i Zyrës së Presidentit të Ukrainës, mbrëmë deklaroi se kanë humbur kontrollin e termocentralit bërthamor të Çernobilit.

Rafael Mariano Grossi, kreu i Agjencisë Ndërkombëtare të Energjisë Atomike, në lidhje me marrjen e kontrollit të ushtrisë ruse mbi termocentralin, tha se "është jetike që të mos ndikohet ose të mos dëmtohet në asnjë mënyrë funksionimi i sigurt i objekteve bërthamore në rajon".