Li Wanê malbatên ku zarokên wan hatine revandin û ji revandina zarokên xwe Partiya Demokrasî û Wekheviya Gelan (DEM Partî) berpirsyar dibînin, vê hefteyê jî li pêşiya serokatiya bajêr a partiyê çalakiya xwe domand.

Malbatên li kuçeya Menekşeyê civiyan, alayên Tirk û wêneyên ewladên xwe bilind kirin û heta pêşiya serokatiya bajêr a DEM partiyê meşiyan.

Dê û bavan bertek nîşanî dengê bilind ê muzîka ji avahiya DEM Partiyê dan û bangî zarokên xwe kirin ku teslîm bibin.

Fevzi Yagmurê ku beşdarî çalakiyê bû, diyar kir ku 9 sal e wî tu xeber ji kurê xwe nesitandiye.

Yagmur bal kişand, ew bi biryar e ku heta ew bigihêje kurê xwe, çalakiya xwe bidomîne û wiha dewam kir, "Ev 9 sal e ez li pey kurê xwe me. Kurê min ez li her derî li te digerim. Were teslîm bibe. Ez û diya te em li benda te ne. Were teslîmî dewletê bibe. Her şev em ji bo te digirîn."

Nazli Sancarê jî bal kişand ku bi salan e ew di çalakiyê da beşdar e da ku bigihêje keça xwe û wiha dewam kir, "Bi quweta dewleta me, keda me badilhewa naçe. Nikarin bi muzîkê me bêdeng bikin. Em serî natewînin. Wekî min roja ewil jî got, em ê bi zorê ewladên xwe ji wan bistînin. Em ê li ber deriyê dijmin veneqetin. Em ewladên xwe ku heqê me ye, dixwazin. Qelema di dest zarokên me da şikandin, çek dan destê wan. Qelem li destê zarokên me dihat."