BEŞÎR ŞAVUR - Di qursa ku ji hêla Miftîtiya Mêrdînê va hatiye vekirin da jinên ku guhên wan nabihîze bi îşaretên destan hînî Qur'anê û agahiyên dînî dibin.

Li navçeya navend Artukluyê, ji bo 4 jinên ku guhên wan nabihîze li Qursa Qur'anê ya Gurbet Yay a girêdayî Miftîtiya Navçeyê bi îşaretên destan di hefteyê da 2 rojan, 6 saet perwerdeya Qur'anê û agahiyên dînî tê dayîn.

Nazan Agaldaya (43) Kordînatora Kesên Nabihîzin ya Miftitîya Bajêr û Hîndekara Qursa Qur'anê Gurbet Yay ji nûçegihanê AAyê re got ew ji sala 2016an û vir va perwerdeyê dide jinên ku guhên wan nabihîze.

Agaldayê anî ziman ku ew pirtûk û alavên ku Serokatiya Karên Diyanetê ji wan ra dişîne li qursê ji bo perwerdeyê bi kar tîne û wiha axivî: "Jin li vir hînî Qur'anê û diayan dibin, bi hev ra dikevin têkiliyê. Ez jî bi îşaretên destan bi wan ra baş têkiliyê datînim, alîkariya wan dikim. Ji bilî Qur'ana Pîroz, em agahiyên exlaqî û têkiliyên malbatî jî didin wan. Ew kêfxweş dibin û spasiya me dikin."

Elîf Çaybuguna 42 salî ya ku li qursê perwerdeyê dibîne bi alîkariya Agaldayê daxuyand ku ew ji bo hînbûna Qur'anê, têgehên dînî, nimêj, hec û zikatê tê qursê û bi hevalên xwe ra jî dema xwe xweş derbas dike.

Hamdiye Çamurdaşê (40) jî got ew ji qursê pir hez dike û dema wê bi hevalên wê ra baş derbas dibe.

Sevgî Şahkulubey Yagci ya 52 salî jî got ew ji bo bicîanîna erkên dînî hatiye qursê û wiha axivî: "Li qursê xwîşkên din ên wek min hene ku astengiya wan a bihîstinê heye. Mamosteya me jî zimanê îşaretê dizane ku ev pir baş e."