Îbrahîm Akkurtê ku li Bazîda navçeya Agiriyê dijî, li gundê xwe çewlik ava kir û tê da hêştirmeyan xwedî dike.

Akkurtê ku li gundê Yilanliyê yê nêzî navenda navçeyê dijî, li ser qadeke 25 dekarî çewlik ava kir û di sala 2023yan da destûrên qanûnî hilda, kar û barên fermî kuta kir û dest bi xwedîkirin û firotina hêştirmeyan kir.

Akkurt li çewlika ku li Çiyayê Agiriyê dinihêre 159 hêştirmeyan xwedî dike û ji AAyê ra qala çîroka avakirina çewlikê kir.

Akkurt diyar kir, niyeta wî hebû ku di 2001ê da çewlikê ava bike, lê pêk nehat û wî timî xeyalê vê yekê kir.

Akkurt daxuyand, wî ji Sakaryayê hêkên hêştirmeyan kirî û bi wan hêkan va bê hêştirme dest bi vî karî kir û piştra wî ji bajarên cuda hêştirme kirîn û li hev zêde kirin.

Akkurt daxuyand, jimara hêştirmeyan car caran derdikeve 200î û gelek kes daxwaz dikin û wiha dewam kir, "Em li ser medyaya civakî difiroşin. Em dişînin hemû bajarên Tirkiyeyê. Armanca me firotina wan nîne, em dixwazin ji bo goşt û ji bo dermaleyan li hev zêde bikin. Em dixwazin salê 20 hezar cûcikên wan bimînin."

Midûrê Çandinî û Daristanê yê Bajêr Mehmet Huseyînoglu jî diyar kir ku midûriya wan avakirina çewlika Akkurt di sala 2023yan da pesend kir û Akkurt dest bi xwedîkirina hêştirmeyan kir.

Huseyînoglu destnîşan kir, di çewlikê da dîk, varik, dermale û seba goştê wan 159 hêştirme hene û wiha dewam kir, "Goşt, hêk, pûrt û çermê hêştirmeyan pir bi qîmet e. Ji sedî 3yê goştê wan don e. Hêkeke wan jî bi qasî 25 hêkên mirîşkan e."