БЕЛГРАД (АА) – Српскиот претседател Александар Вучиќ изјави дека 106 земји не ја признаваат независноста на Косово, а дека 84 земји недвосмислено ја признаваат таа независност. Додаде дека девет нови земји го повлекле признавањето на независноста на Косово, наведувајќи дека се работи за Сомалија, Буркина Фасо, Габон, Есватини, Либија, Гвинеја, Антигва и Барбуда, Света Луција и Малдиви - и дека се чека и десеттата земја да го стори истото, јавува Агенција Анадолија (АА).

Вучиќ на годишната прес-конференција оцени дека Србија „тешко“ ќе може да се спротивстави на влезот на Косово во Советот на Европа и дека ќе се бори Косово да не влезе во УНЕСКО, оценувајќи дека тоа ќе оди „малку потешко“.

„Пред нас се тешки предизвици што се однесува до Косово. Сакавме мир, едвај успеавме да го зачуваме, не по наша вина. Никого не провоциравме ниту една секунда, освен ако некои велат дека провокација е тоа што Косово или нашите граѓани на Косово ги доживуваме како наши државјани и сограѓани, и што тоа го доживуваме како дел од нашата територија во согласност со Уставот“, истакна Вучиќ.

Тој нагласи дека Србија не направила „ниту еден инцидент и ниту еден едностран потег“ и дека од Уставот и од својот народ „нема да се срами“.

Говорејќи за влезот на Косово во Обединетите нации (ОН), Вучиќ рече дека чека „да му дојдат експерти“ да му објаснат дека тоа е единственото можно решение и дека тоа е единствениот излез за Србија.

Тој истакна дека „таканаречените независни медиуми“ во Србија велат дека „Вучиќ ќе има јамка околу вратот“ ако Косово биде независно и им порача дека „таа јамка можат да ја врзат на кокошка“, но дека тешко ќе можат да ја врзат „на горд човек кој не сака да го витка ‘рбетот и да му се клања на окупаторот“.

Вучиќ нагласи дека Србија ќе ја продолжи борбата и дека „секогаш ќе сака мир“ со Албанците, дека ќе инсистира на почитување на сите пет досега потпишани договори и на Повелбата на Обединетите нации, и оцени дека Албанците и меѓународната заедница бегаат од сите тие шест документи и не можат да почитуваат ниеден од нив.

„Ќе ја продолжиме својата борба, секој својата работа – тие уцени и закани, а ние да ја штитиме нашата слобода и независност, да ја чуваме Србија бидејќи друга земја немаме“, рече Вучиќ.

Одговарајќи на новинарско прашање за можното решение што Србија би можела да го понуди за косовската криза кога ќе продолжат преговорите, Вучиќ оцени дека секогаш кога некој ќе понуди решение, „вие би го убиле гласникот и здравиот разум, пред некој да размисли што е добро за нашата земја“.

Истакна дека Србија е подготвена да разговара за „безбројни компромисни решенија“ и подвлече дека тоа мора да бидат компромисни решенија, „а не понижувања за Србија и за српскиот народ на Косово“.

Коментирајќи ја изјавата на српскиот министер за одбрана, Милош Вучевиќ, кој по повод прославувањето на неуставниот Ден на Република Српска рече дека „годините што пред нас мора да бидат во знак на српското обединување“, Вучиќ рече дека како што се слави празникот на националното единство, Србите продолжуваат да се обединуваат „во смисла на културата, јазикот и празниците, а не во смисла на државно-правно обединување“.

„Српското единство, како и секое друго единство, никој не треба да го руши и никому не би требало да му пречи. Му посакувам сѐ најдобро на народот на Република Српска и сакам што повеќе единство со него, не рушејќи го територијалниот интегритет на Босна и Херцеговина или на кој било друг“, заклучи Вучиќ.