ГАЗА (АА) - Во екот на израелските воени операции низ Појасот Газа, палестинските рибари во градот Газа се борат да преживеат поради зголемените ограничувања, влошените услови на морето и постојаната закана од смртоносни напади, јавува Анадолу.

Во крајбрежната енклава, каде што израелските воздушни напади и копнената и поморската блокада го блокираа секојдневниот живот, рибарите секојдневно ги фрлаат своите мрежи во морето, и покрај ризиците по животот.

„Се обидуваме да го сочуваме нашето достоинство, но секој ден некој чамец се враќа оштетен“, изјави рибарот Камал Шараф ал-Шариф за Анадолу.

„Животот сега е ужасно тежок. Денес морето е бурно, тунелите се затворени. Нема работа, нема живот – само морето, а тоа е полно со опасности.“

Тој додава дека рибарите се редовно цел на израелските сили.

„Од Рафа до Беит Ханун, тие се нападнати од Израелци. Во сите морски области – Деир ел-Балах, Рафа, Кан Јунис, пристаништето... каде и да има море, ние сме цел на окупацијата“, рече тој.

„Умираме од глад. Не сакаме војни. Од 5 часот сум тука, немам направено ни 80 шекели. Имам 18 луѓе да хранам.“

Друг рибар, Мохамад Нашат Бакир, ја опиша опасноста уште подетално: „На само три или четири метри од брегот, нѐ напаѓаат вооружени чамци и патроли. Пукаат накај нас, фрлаат бомби – не можеме ниту да ловиме, ниту слободно да се движиме. Исцрпени сме, се бориме за ништо.“

Бакир го истакна и влошувањето на хуманитарната криза: „Преживуваме во незамисливи услови. Границите се затворени, нема храна, нема риба, а морето ни е забрането. Животот овде е целосно запрен.“

„Испраќам порака до целиот свет: Ве молам, решете ги нашите проблеми. Исцрпени сме. Доста ни е. Не можеме повеќе. Ве молам, свету – помогнете ни. Се гушиме. Умираме. Секој ден умираме по илјада пати. Секој ден страдаме“, додаде тој.

Од 2 март, Израел ги затвори сите премини кон Газа, спречувајќи го пристигнувањето на основни намирници, и покрај бројните извештаи за глад во територијата разурната од војна.

Израелската Армија ја обнови офанзивата врз Газа на 18 март, и покрај договорот за прекин на огнот и размена на затвореници постигнат на 19 јануари.

Од октомври 2023 година досега, Израел уби над 51.200 Палестинци во Газа, најголем дел од нив жени и деца.

Во ноември минатата година, Меѓународниот кривичен суд издаде налог за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел исто така се соочува со тужба за геноцид пред Меѓународниот суд на правдата поради војната во Газа.