ПАРИЗ (АА) - Бустер дозите од вакцините против коронавирусот ќе бидат задолжителни за сите возрасни во Франција кои сакаат да влезат на јавни места како ресторани, кафулиња, кина и музеи од почетокот на наредната година, изјави францускиот министер за здравство, Оливиер Веран, јавува Агенција Анадолија (АА).

Веран на прес-конференција за откривање на мерките во услови на зголемени случаи на коронавирусот ги отфрли ограничувањата како што се карантин, полициски час, предвремено затворање на продавници или ограничување на движењето.

„Имаме средства за да се бориме со овој петти бран. Можеме да успееме да го поминеме овој бран без дополнителни ограничувања за населението“, рече тој, најавувајќи дека возрасните лица ќе можат да ги примат бустер дозите од сабота, доколку поминале пет месеци од нивното последно вакцинирање.

„Во отсуство на трета доза, здравствената пропусница - дигитален доказ за вакцинација или негативен резултат на РТ-ПЦР-тест за влез на јавни и социјални места - ќе биде неважечка од 15 јануари“, додаде Веран.

За да ги поттикне 6-те милиони невакцинирани луѓе да ја добијат здравствената пропусница, Владата, исто така ја намали валидноста на ПЦР-тестовите на 24 часа, почнувајќи од 29 ноември.

Претходно, оние кои се невакцинирани можеа да добијат пристап до здравствената пропусница за да влезат во ресторани или да патуваат со возови и да имаат летови на долги релации преку ПЦР-тестови направени 72 часа однапред.

Носењето маски ќе биде задолжително од 26 ноември, на сите затворени места, јавни места и големи места како отворени божиќни пазари.