Дејвид Бејкер, Демис Хасабис и Џон Џампер ја добија Нобеловата награда за хемија за 2024 година

АНКАРА (АА) - Нобеловата награда за хемија за 2024 година им беше доделена на американскиот биохемичар Дејвид Бејкер и британските научници Демис Хасабис и Џон Џампер за пионерската работа во дизајн на протеини и предвидување на структурата на протеините врз основа на вештачката интелигенција (ВИ), објави шведската Кралска академија на науките, пренесува Анадолу.

На Бејкер му беше доделена половина од наградата за „компјутерски дизајн на протеини“. Со неговото истражување, кое го започна во 2003 година, се постигна она што порано беше недостижно: создавање целосно нови протеини.

Оттогаш работата на Бејкер доведе до производство на голем број иновативни протеини, отворајќи потенцијални примени за фармацевтските производи, вакцини, наноматеријали и прецизни молекуларни сензори.

„Со речиси невозможниот подвиг Дејвид Бејкер успеа да изгради сосема нови видови протеини“, соопшти Академијата. Неговите првични дизајни поттикнаа бран на имагинативно истражување, произведувајќи уникатни протеини што би можеле да трансформираат различни области во здравјето и технологијата.

„Другата половина од наградата заеднички ја добија Демис Хасабис, коосновач и извршен директор на 'Google DeepMind', и Џон М. Џампер, исто така, од 'DeepMind' за решавање на 50-годишен научен предизвик на предвидување на сложени протеински структури. Во 2020 година Хасабис и Џампер го претставија 'AlphaFold2', револуционерен модел со вештачка интелигенција способен да ги предвиди структурите на речиси сите 200 милиони познати протеини“, објавија од Академијата.

Од неговото објавување, до „AlphaFold2“ пристапија над два милиона истражувачи од 190 земји, што се покажа како неопходно за научниците што сакаат да ги разберат биолошките улоги и примената на различни протеини.

Нобеловиот комитет го нагласи глобалното влијание на „AlphaFold2“, опишувајќи го како непроценлив ресурс за унапредување на биолошките истражувања во невидени размери.