ПАРИЗ (АА) - Најмалку 6 лица исчезнаа во водени буици и поплави во јужниот дел на Франција, а власта на оваа земја издаде „портокалов“ метео-аларм поради неповолните временски услови во 12 провинции, известува Анадолу.

Локалните власти на провинцијата Гар соопштија дека во водени буици исчезнале татко и две деца во обид да прејдат мост на надојдена река во местото Дион, а уште две жени исчезнале во буиците во подрачјето на Гударг. Во водена буица во Гањиер исчезна 62-годишен возач.

Надлежните служби се на терен и спроведуваат акции на претрага и спасување, како и акции за евакуација на загрозеното население на тој француски регион.

Паралелно со тоа, француската метеоролошка служба „Meteo France“ издаде „портокалово“ предупредување во 12 провинции.

Во соопштението за опасност од поплави се предупредуваат жителите на провинциите Јон, Приморска Шаранта, Жиронда, Лозер, Аверон, Ланд, Гар, Ардеш, Вливот на Рона и Вар, додека на можни бранови се предупредени жителите на крајбрежната провинција Атлантски Пиринеи. Жителите на Приморски Алпи се предупредени на опасност од лавина.