ГАЗА (АА) - Палестинците ја извршија првата петочна молитва (џума намаз) меѓу урнатините на џамиите низ енклавата срушени во израелските воздушни напади, јавува Анадолу.

На петочна молитва Палестинците се собраа во остатоците на џамијата Имам Шафии во населбата Зејтун во градот Газа, во историската Голема џамија Омар, позната и како Големата џамија на Газа, најголемата и најстара џамија во Појасот Газа, потоа меѓу урнатините на џамијата Насрудин ал Албани во Кан Јунис и на други места.

Во текот на месецот на постот, Рамазан, муслиманите постат од зори до зајдисонце, воздржувајќи се од храна, пијалак, пушење и физичка интимност. Тие, исто така, се охрабруваат да ги зголемат своите молитви, особено ноќе, да го рецитираат Светиот Куран, да се вклучат во повеќе добротворни активности и да го поддржуваат праведното однесување.

Над 48.400 Палестинци се убиени, главно жени и деца, а повеќе од 111.800 се повредени во бруталниот израелски напад врз Газа од октомври 2023 година.

Нападот, кој ја остави енклавата во урнатини, беше прекинат според договорот за прекин на огнот во Газа и размена на затвореници што стапи на сила на 19 јануари.

Меѓународниот кривичен суд во ноември издаде налози за апсење на Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.