ВАШИНГТОН (АА) - Американскиот претседател Доналд Трамп рече дека Русија е подготвена да постигне мировен договор, но убедувањето на Украина да го потпише договорот е „потешко“ од очекуваното, јавува Анадолу.

„Мислам дека имаме договор со Русија. Мора да постигнеме договор со Зеленски и се надевам дека Зеленски, мислев дека е полесно да се справиме со Зеленски. Досега беше потешко. Но в ред е“, рече Трамп во Овалната соба додека ги потпишуваше извршните наредби, говорејќи за украинскиот претседател Владимир Зеленски.

„Се е в ред, но мислам дека имаме договор и со двајцата. Се надевам дека ќе го направат тоа затоа што сакам да штедам и, знаете, трошиме многу пари, но тука се работи за многу хуманост“, додаде тој.

Претходно во текот на вчерашниот ден Трамп го критикуваше Зеленски за изјавите што ги даде за време на прес-конференцијата во вторникот, со кои отфрли секаква можност Киев да ја признае руската окупација на Кримскиот Полуостров.

„Оваа изјава е многу штетна за мировните преговори со Русија со тоа што Крим беше изгубен пред неколку години под покровителство на претседателот Барак Хусеин Обама и не е ниту точка на дискусија. Никој не бара од Зеленски да го признае Крим како руска територија, но, ако го сака Крим, зошто не се бореа за него пред да ѝ биде предаден на Русија пред единаесет години без испукан куршум?“, рече тој во објавата на социјалните мрежи.

Запрашан од новинарот дали договорот што Трамп рече дека Русија го прифатила вклучува и признавање на суверенитетот на Кремљ над Крим, Трамп одговори „сè е в ред“.

„Видете, јас само сакам да го видам крајот на војната. Не ми е грижа. Ако и двајцата се среќни, двајцата потпишуваат договор. Немам фаворити. Не сакам да имам никакви фаворити. Сакам да се направи договор. Сакам да спасам животи“, рече тој.

Понатаму тој рече дека е „можно“ да се сретне со рускиот претседател Владимир Путин за време на неговото патување во Саудиска Арабија во средината на мај, но рече дека „најверојатно“ тоа е тешко.

„Мислам дека ќе се сретнам со него набрзо потоа“, рече тој.

Коментирајќи ги состаноците одржани во Лондон во средата меѓу неговиот претставник за Русија и Украина, Кит Келог, шефот на кабинетот на Зеленски, Андриј Јермак, и претставници од други земји, Трамп рече дека состанокот „мина добро“.

„Мора да натераме двајца луѓе, двајца паметни луѓе, да се договорат, а штом се договорат, убивањето ќе престане. Но мислам дека поминаа добро, прилично добро“, рече тој.

Претставниците на Велика Британија, Франција, Германија и САД се состанаа во Лондон со украинската делегација предводена од Јермак, министерот за надворешни работи Андриј Сибиха и министерот за одбрана Рустем Умеров на уште една рунда разговори по состанокот во Париз минатата недела.