АТИНА (АА) - Шефот за надворешна политика на ЕУ, Жозеп Борел, денес предупреди на брзото ширење на полиовирусот (детска парализа) во Појасот Газа, нагласувајќи ја потребата од прекин на огнот за да им се овозможи на децата да се вакцинираат против оваа болест, која може да предизвика неподвижност на дел од екстремитетите до крајот на нивниот живот, известува Анадолу.

„Брзото ширење на детската парализа им се заканува на сите деца во Газа, веќе ослабени од раселување, лишување и неисхранетост“, изјави тој на X.

Апелирајќи за итен тридневен прекин на огнот, независен од пошироки преговори, за да им се овозможи на СЗО и УНИЦЕФ да спроведат вакцинации, Борел рече: „Нашето човештво го бара тоа“.

Министерството за здравство на Газа на 16 август го објави првиот потврден случај на полиомиелитис во Појасот Газа во последните 25 години, во градот Деир ал Балах. Случајот вклучуваше 10-месечно бебе кое не примило никакви дози од вакцината против детска парализа.

Оваа болест примарно ги погодува децата на возраст под пет години, при што една од 200 инфекции доведува до неповратна парализа. Според Светската здравствена организација (СЗО), меѓу 5 отсто и 10 отсто од парализираните умираат поради неможноста на нивните респираторни мускули да функционираат.

Израел ја продолжи својата брутална офанзива врз Појасот Газа по нападот на палестинската група Хамас минатиот 7 октомври, и покрај резолуцијата на Советот за безбедност на ОН која повикува на итен прекин на огнот.

Израелските напади резултираа со убиени најмалку 40.476 Палестинци, главно жени и деца, и над 93.600 повредени, информираа локалните здравствени власти.

Тековната блокада на Газа доведе до сериозен недостиг на храна, чиста вода и лекови, оставајќи голем дел од регионот во урнатини.

Израел се соочува со обвинувања за геноцид пред Меѓународниот суд на правдата, кој нареди запирање на воените операции во Рафа, каде над еден милион Палестинци побараа засолниште пред областа да биде нападната на 6 мај.