ДУЗЏЕ (АА) - Здравјето на младенчето од кафеава мечка во северозападната турска област Дузџе се подобри по еден ден откако консумираше големо количество „луд мед“ и се зашемети од него, јавува Агенција Анадолија (АА).

Кога шестмесечното мече било донесено во подружницата за Заштита на природата и на националните паркови откако изело големо количество од „лудиот мед“ вчера, било исцрпено и не можело да се движи, соопшти Мевлут Шанли Шимшек, управител на подружницата.

„Нашите тимови го однесоа на ветеринар, [кај кого] го започнавме процесот на лекување. Тоа е во многу добра здравствена состојба. Планираме да го вратиме назад во неговата природна средина кога [целосно] ќе закрепне“, изјави Шимшек за АА.

Жителите на Дузџе го пронашле мечето и загрижени за неговата состојба го однеле со камион кај локален ветеринар.

„Кога го прегледавме, видовме дека животното е во шок и има потреба од итно лекување“, рече ветеринарот Мурат Унлу.

Истакнувајќи дека здравјето на младенчето е подобрено, но дека лекувањето сѐ уште продолжува, Унлу рече: „Мечето е многу подобро во споредба со состојбата во која беше донесено. [Сега] Може да јаде и да оди. Кога мечето целосно ќе го поврати здравјето во наредните денови, ќе го вратиме кај неговата мајка.“

Бидејќи „лудиот мед“ е широко достапен во регионот, тој додаде, „Јас мислам дека мечето изело горчлив мед бидејќи е сѐ уште бебе и не можело да го знае тоа. Пчелите најверојатно го искасале. Како резултат на токсичноста на горчливиот мед и повредите предизвикани од пчелите, кај него се појавиле симптомите како халуцинација и шок.“