БОЛУ (АА) - Наил Јузколар (70), кој им го засладува животот на жителите на турскиот град Болу со сладоледите произведени од природен салеп и неколку вида млеко повеќе од половина век и ја продолжува традицијата што неговите дедовци ја започнале на Балканот, пишува Анадолу.

Јузколар за Анадолу рече дека неговото семејство прави сладолед во Болу уште од 1964 година.

Раскажувајќи дека во оваа професија е речиси 61 година, Јузколар рече: „Тоа е професија што ја наследив од моите дедовци. Со оваа професија се занимаваме веќе четири генерации. Се трудиме да ја продолжиме. Се надевам дека и моите деца ќе ја продолжат традицијата.“

Зборувајќи дека со генерации продаваат сладолед во повеќе места, Јузколар рече: „Правев сладолед и на Балканот, во Скопје, Сараево и Софија. Во Скопје, дуќанот кој сега е позната бурекчилница, некогаш беше наш дуќан во кој продававме сладолед. Сега тој дуќан го водат моите роднини. Моите дедовци и мојот татко работеа таму.“

Јузколар рече дека прво дошле во турскиот град Адапазари, од каде што преминале во Болу во 1964 година, каде продолжиле да ја работат својата професија, и додаде дека нема многу нешта што се смениле во секторот за сладолед.

Раскажувајќи за сладоледот, Јузколар рече дека од Едрене до Карс, вкусот на сладоледот е секаде различен. Зборувајќи за важноста на квалитетот на состојките од кои се произведува сладоледот, Јузколар наведе: „За убав сладолед, млекото и салепот мора да бидат со висок квалитет. Сладоледот се прави од козјо, овчо и кравјо млеко, но може и од биволско млеко. Кое млеко ќе се користи зависи од регионот во Туркије. Во Тракискиот Регион за производство на сладолед се користат козјо, овчо и кравјо млеко. Во југоисточна Туркије, сладоледот се произведува од козјо млеко, а во Црноморскиот Регион, тој се прави од кравјо млеко. Ние пак, сладоледот го правиме од неколку млека. Користиме кравјо, биволско и козјо млеко“, рече Јузколар.