ПЕКИНГ (АА) - Бројот на загинати во вчерашните разорни земјотреси во Мјанмар се зголеми на 1.644, а повеќе од 3.408 лица се повредени, известува Анадолу.

Мјанмарската државна телевизија МРТВ објави дека 68 лица сѐ уште се водат за исчезнати.

Меѓународната помош и напорите за пребарување и спасување продолжуваат додека Мјанмар и Тајланд се соземаат од разорните земјотреси.

Властите во соседен Тајланд информираа дека во земјотресите од кои се погодени 11 провинции во земјата загинале 8 лица, а 101 се водат како исчезнати по уривањето на облакодер во Бангкок.

- Се урнаа џамии, манастир, брана и мост

На социјалните мрежи објавени се многу видеа на кои може да се забележат голем број урнати згради и оштетена инфраструктура, вклучително и историскиот будистички манастир Ма Сое Јане, во Мандалај, вториот по големина град во Мјанмар, каде што земјотресот беше најмногу почувствуван.

Најмалку 50 џамии низ Мјанмар се урнаа за време на петочната молитва, убивајќи близу 300 луѓе, објави медиската куќа ‘Khit Thit News’.

Хуманитарната организација Христијанска помош (Chirstian Aid) обајви дека нивните претставници кои се на местото на несреќата известиле дека браната во градот се урнала и нивото на водата се зголемува во ниските подрачја.

Во регионот Сагаинг, епицентарот на земјотресот, се урнал мост, а оштетен е и автопатот што ги поврзува градовите Мандалај и Јангон.

Од земјотресот се оштетени објекти во главниот град Нејпидо, меѓу кои има и верски храмови.

Портпаролот на воената администрација, генерал-мајор Зау Мин Тун соопшти дека во болниците во регионите погодени од земјотресот има итна потреба од крв и апелираше за дарување крв.

- Кина, Русија и Индија испратија спасувачки тимови

По меѓународниот повик за помошупатен од воената администрација во Мјанмар по земјотресот, земјите почнаа да испраќаат спасувачки тимови и помош.

Малезија, Индонезија, Индија, Австралија, Пакистан, Нов Зеланд и други нации изразија солидарност и понудија помош за Мјанмар, земја која е поприште на внатрешни етнички конфликти.

Кинеската агенција Синхуа објави дека хуманитарен тим од 37 лица од кинеската провинција Јунан ова утро стигнал во градот Јангон во Мјанмар. Спасувачкиот тим со себе носи детектори за топлина, системи за предупредување за земјотреси и беспилотни летала со цел да помогне во активностите за спасување на настраданите.

Руската агенција ТАСС објави дека руското Министерство за вонредни ситуации испратило два авиони со 120 специјалисти, анестезиолози и психолози, К9 единици за пребарување и спасување и хуманитарен материјал за настраданите.

Индискиот министер за надворешни работи Викрам Мисри на платформата на социјалните мрежи Х објави дека неговата земја испратила спасувачки тим и медицински тим, како и основни материјали како што се ќебиња, церади, хигиенски комплети, вреќи за спиење, светилки на соларна енергија, пакети со храна и прибор за погодените од земјотресот.

Во меѓувреме, Министерството за надворешни работи на Малезија и малезиската амбасада во Мјанмар објавија дека ќе испратат хуманитарна помош и тим од 50 службеници за помош при катастрофи во Јангон.

- ОН ќе доделат 5 милиони долари фонд за итни случаи

Канцеларијата за координација за итна помош за хуманитарни прашања на Обединетите нации (ОН) објави дека е доделен итен фонд од 5 милиони американски долари за активности за помош при катастрофи во регионот.

Портпаролот на ОН Стефан Дујарик изјави дека очекуваат земјотресот дополнително ќе ја усложни хуманитарната ситуација во Мјанмар, каде во моментов 20 милиони луѓе имаат потребна хуманитарна помош.

- Потешкотии во пристапувањето до погодените подрачја

Додека воената администрација во Мјанмар прогласи вонредна состојба во 6 региони поради катастрофата, не е познато дали може да се достави помош во некои делови од земјата каде сѐ уште трае граѓанската војна.

Црвениот крст соопшти дека медицинските тимови имале потешкотии при пристапот до регионите Мандалај и Сагаинг, каде земјотресот предизвика најмногу разурнувања, и во јужната провинција Шан, поради оштетувањето на далноводите.

Во соопштението се наведува дека според првичните извештаи од терен, земјотресите направиле големи штети.

Генерал Мин Аунг Хлаинг, лидер на мјанмарската хунта, ги посети погодените области во регионот Мандалај и ги разгледа преземените мерки за спасување на луѓето, објави државната МРТВ преку платформата Телеграма.

Хунтата апелирала до меѓународната заедница за хуманитарна помош.

Силен земјотрес со интензитет од 7,7 степени според Рихтеровата скала се случи во петокот со епицентар во областа Сагаинг, во Мјанмар.

Само 12 минути подоцна следеше нов земјотрес со јачина од 6,4 степени според Рихтер, соопшти Геолошкиот институт на САД.