БЕРЛИН (АА) - Во цела Германија се одбележува 35-годишнината од падот на Берлинскиот ѕид, кој го означи почетокот на крајот на владеењето на комунизмот, не само во Источна Германија, туку и во повеќето до тогаш социјалистички држави во Европа, јавува Анадолу.

Во главниот град Берлин, во рамките на манифестацијата „Haltet die Freiheit hoch“, поставени се илјадници плакати во центарот на градот, на делницата од четири километри по која минуваше Берлинскиот ѕид, кој ги делеше Источна и Западна Германија повеќе од две децении.

Иако повеќето плакати во последниве месеци беа дизајнирани од жителите на Берлин, некои од нив се транспаренти што ги носеа демонстрантите за време на протестите против поранешната источногерманска администрација во 1989 година.

На различни места долж рутата се одржуваат и мали изложби и мултимедијални презентации.

Во Меморијалниот музеј на ѕидот во дистриктот Мите, посветена е комеморација за оние кои ги загубија животите преминувајќи од Источен во Западен Берлин за време на Студената војна.

На комеморацијата присуствуваа и германскиот претседател Франк-Валтер Штајнмаер и премиерот на Берлин Каи Вегнер.

Говорејќи на настанот, на кој учесниците оставаа рози на спомен-ѕидот, Вегнер побара заштита на слободата и порача: „Без слобода, сè останато е ништо“.

Германскиот канцелар Олаф Шолц во видеопорака истакна дека пред 35 години, есента 1989 година, „храбрите граѓани ја уништија ‘железната завеса’“.

„Победата на слободата есента 1989 година беше победа за Европа колективно“, рече Шолц.

Германскиот канцелар наведе дека падот на Берлинскиот ѕид пред 35 години беше врвот на среќата постигната со развојот низ цела Европа во тоа време.

„Ова е среќен ден за кој ние Германците сме благодарни“, рече Шолц.

Повикувајќи ја јавноста на единство, Шолц рече: „Нашата заедничка историја во есента 1989 година ни покажува како можеме да ги постигнеме своите цели. Заедно за мир и слобода, за безбедност и просперитет, за владеење на правото и демократијата“.

По повод 35-годишнината од падот на Берлинскиот ѕид до вечерните часови во градот ќе се одржат бројни манифестации.

Берлинскиот ѕид е изграден со одлука на тогашниот комунистички режим за да се спречи заминувањето на источните Германци во демократските западни земји. Падот на Берлинскиот ѕид не значеше само обединување на Германија туку и почеток на падот на комунистичкиот режим, односно крај на Студената војна.

Берлинскиот ѕид беше долга бариера што го делеше Западен од Источен Берлин и окружната територија на Германската Демократска Република. Го изградила источногерманската влада и добила пропагандно име со придавката „антифашист“.

Изградбата започна на 13 август 1961 година и беше надоградуван неколкупати. Ѕидот не беше само обична бодликава жица над висока бариера од тули, туку имаше улога на џиновски бетонски ѕид што го обиколуваше Западен Берлин, практично делејќи го градот, отсекувајќи улици и раздвојувајќи многу семејства и пријатели.

Падот на Берлинскиот ѕид на 9 ноември 1989 година, кој беше пресвртница и за Германија и за Европа, стави крај на режимот на Источна Германија или Германска Демократска Република (ГДР), а социјалистичкиот блок во Европа исчезна.

Помеѓу 1949 и 1961 година, околу три милиони луѓе, особено образовани и квалификувани млади луѓе, избегаа на Запад од Источна Германија, чија економија се влошуваше.

За да ги спречи овие бегства, администрацијата на Германска Демократска Република одлучи тајно да ја затвори границата во Берлин во саботата вечер, на 12 август 1961 година.

Долг 156 километри, Берлинскиот ѕид беше причина за смртта на најмалку 138 луѓе кои беа убиени при обид да го преминат. Многу други, кои се спречени во тоа, завршија во зандани.

Поради се поголемата желба за обединување, на 9 ноември 1989 година е отворен за непречен сообраќај, а потоа целосно е урнат. Само неколку часа по падот на Берлинскиот ѕид беа отворени и други гранични премини, а десетици илјади Германци танцуваа пред и на ѕидот. Истиот ден по падот на ѕидот, милион луѓе преминаа во Западен Берлин.

Првите две лица кои го загубија животот при обидот да го преминат Берлинскиот ѕид беа Ида Сиекман и Гунтер Лифтин.

Со години, а особено по обединувањето, Германија е најголемата економска сила во Европа и меѓу водечките во светот.