ئیستانبوڵ ــ AA

ڕاوێژکاری ئاسایشی نەتەوەیی عێراق، قاسم ئەعرەجی ڕایگەیاند کە وڵاتەکەی پاڵپشتی لە ئاسایش و سەقامگیریی سووریا دەکات.

قاسم ئەعرەجی لە ھەژماری خۆی لە تۆڕی کۆمەڵایەتی ئێکس لەبارەی ڕووداوەکانی ئەم دواییە لە سووریا، ڕایگەیاندووە: "یەکگرتوویی سووریا و دەستەبەرکردنی ئاسایش و سەقامگیرییەکەی، پێویستی بە ژێری و میانڕەویی ھەیە کە دوور بێت لە تایفەگەری و نەتەوەپەرستی".

جەختی لەوەش کردووەتەوە: "سووریایەکی سەقامگیر کە لەگەڵ پێکھاتەکانیدا ئاشت ببێتەوە، ئامانجی ھەر ھاووڵاتییەکە کە وڵاتەکەی و گەلەکەی خۆشدەوێت".

ھەروەھا ڕاوێژکاری ئاسایشی نەتەوەیی عێراق ئاماژەی بەوەشداوە کە وڵاتەکەی پاڵپشتی لە ئاسایش و سەقامگیریی سووریا دەکات.

ڕۆژی پێنجشەممەی ھەفتەی ڕابردوو، پارێزگاکانی تەرتووس و لازقیە کە بە ناوچە کەناراوییەکانی سووریا ناسراون ڕووبەڕووی گرژیی و ئاڵوزیی بوونەوە، ئەوەش بەھۆی رووبەڕووبوونەوەی نێوان ھێزە ئەمنییەکانی سەربە دەسەڵاتی نوێی سووریا و پاشماوەکانی ڕژێمی ڕووخاوی بەشار ئەسەد.

ڕۆژی ھەینی ڕابرووو، چەند سەرچاوەیەکی ئەمنیی لە سووریا بە ئاژانسی ئانادۆڵویان ڕایانگەیاندبوو کە لە ئاکامی رووبەڕووبوونەوەی ھێزە ئەمنییەکانی سەربە دەسەڵاتی نوێی سووریا و پاشماوەکانی ڕژێمی ڕووخاوی بەشار ئەسەد لە پارێزگاکانی لازقیە و تەرتووس، ٥٠ کەس لە ھەردوولا کوژراون.