ھەولێر - AA

سەرۆکی ھەرێمی کوردستان-عێراق، نێچیرڤان بارزانی لە یادی ٣٧ ساڵه‌ی کارەساتی کیمیابارانکردنی ھەڵەبجەدا پەیامێکی بڵاوکردەوە و تێیدا ئاماژە بەوە دەکات کە ئەرکی حکوومەتی عێراقە بەرپرسیاریەتیی یاسایی و ئەخلاقیی خۆی بەرانبەر قوربانییان و ھەموو پابەندییەکانی دەرھەق بە ھەڵەبجە و دانیشتووانەکەی جێبەجێ بکات.

سەرۆکی ھەرێم نێچیرڤان بارزانی لە پەیامێکدا ڕایگەیاندووە: "کیمیابارانکردنی ھەڵەبجە تەنیا تاوانێک نەبوو، بەڵکوو بەشێکی خەمناک بوو لە زنجیرەیەک تاوان و جینۆساید کە ئامانجیان نەھێشتنی گەلی کوردستان بوو. ھەڵەبجە بووە ھێمایەکی جیھانی بۆ ستەملێکراویی گەلەکەمان و شایەدحاڵێک بۆ دڕندەییی ئەو تاوانانەی دژی ئەنجام دران. ئەگەر دادپەروەرییەکی ڕاستەقینە ھەبووایە، ئەم کارەساتە بە تەنیا بەس بوو بۆ داننان بە ھەموو مافە ڕەواکانی گەلی کوردستاندا".

لە بەشێکی پەیامەکەدا ھاتووە: "لەم یادەدا، جارێکی دیکە جەخت دەکەینەوە کە پێویستە قەرەبوو‌ی خەڵکی ھەڵەبجە و ھەموو قوربانییانی جینۆساید و ئەنفال بکرێتەوە و لە ھەموو بوارەکاندا باشترین خزمەتگوزارییان پێشکەش بکرێت. ئەرکی حکوومەتی عێراقە بەرپرسیاریەتیی یاسایی و ئەخلاقیی خۆی بەرانبەر قوربانییان و ھەموو پابەندییەکانی دەرھەق بە ھەڵەبجە و دانیشتووانەکەی جێبەجێ بکات و دادپەروەرییان بۆ بەدی بھێنێت، ھەروەھا ھەموو ڕێکارەکانی بەپارێزگابوونی ھەڵەبجە تەواو بکات، پێویستە کۆمەڵگای نێودەوڵەتییش لە ھەوڵەکانی بۆ دڵنیابوون لە دووبارەنەبوونەوەی ئەم جۆرە تاوانانە لە ھەر شوێنێکی جیھان بەردەوام بێت".