بڕیاری دەستگیرکردن بۆ سەرۆکی گەورەشارەوانی ئیستانبوڵ ئیمامئۆغڵو و ٩٩ کەسی دیکە دەرکرا

ئیستانبوڵ - AA

بەتۆمەتی "بوونە بەڕێوەبەری ڕێکخراوی تاوانکاری، ئەندامبوون لە ڕێکخراوی تاوانکاری، بەرتیل وەرگرتن، بەرتیل دان، فریودان، بەدەستهێنانی زانیاری کەسی بە نایاسایی و ساختەکاری لە تەندەردا" بڕیاری دەستگیرکردن بۆ سەرۆکی گەورەشارەوانی ئیستانبوڵ و ٩٩ گومانلێکراوی دیکە دەرکرا.

لە ڕاگەیاندراوێکدا کە لەلایەن سەرۆکایەتی داواکاری گشتیی کۆماری ئیستانبوڵەوە بڵاوکراوەتەوە، ئاماژە بەوە کراوە دوای وەرگرتنی ڕاپۆرت لە بارەی ئەو شایەتحاڵانەی لە چوارچێوەی لێکۆڵینەوە لە دیمەنەکانی "پارە ژماردن" لە جەهەپەدا ئیفادەیان داوە، باسیان لەوە کردووە کە "سەرۆکی گەورەشارەوانی ئیستانبوڵ ئیمامئۆغڵو و ژمارەیەکی زۆر کەس زۆریان لە بازرگانان کردووە پارە بدەن، سووکایەتیان بە ژمارەیەک بازرگان کردووە و بەناڕەوا قازانجیان دەستکەوتووە، لە ڕێگەی کەسانی داردەستیانەوە کڕین و فرۆشتنیان ئەنجامداوە و کەسانی مەدەنییان بەکارهێنا کە بە 'قاسەی نهێنیی' ناودەبرێن بۆ گواستنەوە و کۆکردنەوەی ئەو پارەیەی بە تاوان دەستیانکەوتووە، دەست بە لێکۆڵینەوە کراوە.

لە لێکۆڵینەوەکەدا باس لەوە کراوە کە ئیمامئۆغڵو سەردەستەی ڕێکخراوە تاوانکارییەکەیە و ئەو کەسانەی سەربەخۆی بوون و لە سەردەمی سەرۆکایەتی شارەوانی بەیلیکدوزو کاریان لەگەڵ کردووە، کاتێک بووەتە سەرۆکی گەورەشارەوانی ئیستانبوڵ ئەو کەسانەی هێناوەتە ناو یەکەکان و لایەنە پەیوەندیدارەکانی گەورە شارەوانی ئیستانبوڵەوە و، ئەو گومانلێکراوانەش بە ئامانجی درێژەدان بە ڕێکخراوە تاوانکارییەکە ژێرخانی خۆیان پێکهێناوە و، لە زۆرێک لە کارەکانی شارەوانیدا لە ڕێگەی تەندەرە ناپەسەندەوە تاوانی "ساختەکردنی تەندەر"، "فریودان"، " بەدەستهێنانی زانیاری کەسی بە نایاسایی"، "بەرتیلدان" و "بەرتیل وەرگرتن"یان ئەنجامداوە.

هەروەها لە ڕاگەیاندراوەکەدا هاتووە: "ئەندامانی ڕێکخراوەکە لە ڕێگەی ئەو کۆمپانیایانەی دایانمەزراندوون کۆمپانیای پشکداری میدیا و کۆمپانیای پشکداری کلتور، نرخ بەرزیان بۆ کارەکانی دابینکردنی خزمەتگوزاری لێداوە و خۆیان نرخی کۆتاییان دیاری کردووە و کارێکیان وەرگرتووە کە زۆر لە بەهای خۆیان زیاتر بووە. زۆرێک لەو کارانەی وەریانگرتووە تەواویان نەکردووە، بە ئەنجامدانی بەڵگەنامەی ساختە ئەو پارانەی وەریانگرتووە بەکاریانهێناوە بۆ خۆدەوڵەمەند کردن و چالاکییەکانی ڕێکخراوە تاوانکارییەکە".

لە ڕاگەیاندراوەکەدا ئەوەیش خراوەتەڕوو کە گومانلێکراوەکان بەشێوەیەکی نایاسایی زانیاری کەسی ئەو کەسانەیان دەستخستووە کە لە ئیستانبوڵ دەژین و بەکاریانهێناوە بۆ بەردەوامیدان بە ڕێکخراوەکە و، ئەو ئەندامانەی ڕێکخراوەکە کە تەندەریان لە کۆمپانیا پشکدارەکانی Medya AŞ، Kültür AŞ، KİPTAŞ و İSFALT وەرگرتووە، ئەو گوژمە پارەیەی پێشوەختە لە شارەوانیان وەرگرتووە یان ناردوویانە بۆ شوێنەکانی بیناسازی ئیمامۆغڵو یان سەروەت و سامانیان گواستووەتەوە سەر کۆمپانیاکانی.

لە بەشێکی ڕاگەیاندراوەکەدا باس لەوەیش کراوە کە ئەو بازرگان و کەسانەی لە ڕێگەی تەندەری کراوەوە تەندەریان لە گەورەشارەوانی وەرگرتووە پارەیان بۆ خەرج نەکراوە و، هاتووە: "ئەوەیش ئاشکرا بووە کە لە ڕێگەی هەڕەشەوە پارە وەرگیراوە، داوای بەرتیل لە زۆرێک لەو دووکان و شوێنکارانە کراوە کە لە ئێستادا چالاکن، هەوڵدراوە بە بڕیاری ئەنجوومەنی شارەوانی بە زۆر پارە لەو قوربانییانە وەربگیرێت کە قبوڵیان نەکردووە".

هاوکات لە ڕاگەیاندراوەکەدا هاتووە: "لەو چوارچێوەیەشدا فەرمان بە بەڕێوەبەرایەتی هۆبەی بەرەنگاربوونەوەی تاوانە داراییەکان لە بەڕێوەبەرایەتی ئاسایشی ئیستانبوڵ کراوە بەتۆمەتی "بوونە بەڕێوەبەری ڕێکخراوی تاوانکاری، ئەندامبوون لە ڕێکخراوی تاوانکاری، بەرتیل وەرگرتن، بەرتیل دان، فریودان، بەدەستهێنانی زانیاری کەسی بە نایاسایی و ساختەکاری لە تەندەردا" بۆ دەستگیرکردن، گەڕان و دەستبەسەرداگرتنی ١٠٠ گومانلێکراو، لەوانەش گومانلێکراو ئیمامئۆغڵو کە دەرکەوتووە سەردەستەی ڕێکخراوی تاوانکاریە، لەگەڵ هەریەک لە گومانلێکراوانی دیکە مورات ئۆنگون، تونجای یڵماز، فاتیح کەلەش، ئەرتان ئەران کە لە پێگەی بەڕێوەبەری ڕێکخراوەکەدان و ٩٥ گومانلێکراو کە پەیوەندیان بەم کەسانەوە هەیە".

ئاماژە بەوە کرا کە لە چوارچێوەی لێکۆڵینەوەکەدا ژمارەیەک لە گومانلێکراوان دەستگیرکراون.