ئیستانبوڵ - AA

ئاژانسی نەتەوە یەکگرتووەکان بۆ هاوکاری و کاروبارەی پەنابەرانی فەڵەستین لە ڕۆژهەڵاتی نزیک (UNRWA)، بە ئاماژە کردن بەوەی لە یەک ڕۆژدا لە غەززەی ژێر هێرش و پەلاماری ئیسرائیلدا زیاتر لە ١٨٠ منداڵ گیانیان لەدەستداوە، داوای ئاگربەستی کرد.

لە ڕاگەیاندراوێکدا کە لە هەژماری خۆی لە تۆڕی کۆمەڵایەتی بڵاویکردەوە، ئاژانسی UNRWA باسی لە دۆخی غەززە کرد کە ئیسرائیل لە ١٨ی ئاداردا ئاگربەستی شکاند و سەرلەنوێ دەستیکردەوە بە هێرشی توندەکانی.

لە ڕاگەیاندراوەکەدا هاتووە: "تەنیا لە یەک ڕۆژدا لە غەززە زیاتر لە ١٨٠ منداڵ کوژراون. ئەگەر سەرلەنوێ ئاگربەست فەراهەم نەکرێتەوە، ئەوا لەدەستدانی گیانی بە ڕێژەیەکی زۆر بەردەوام دەبێت" .

لە ئاکامی ئەو هێرشانەی سوپای ئیسرائیل لە حەوتی تشرینی یەکەمی ٢٠٢٣ەوە هەتا ئێستا دەیکاتە سەر غەززە، نزیکەی ١٨ هەزار منداڵ گیانیان لەدەستداوە کە زیاتر لە هەزار منداڵیان منداڵی ساوابوون.

سوپای ئیسرائیل لە ١٨ی ئاداردا ئەو ئاگربەستەی شکاند کە لە ١٩ی کانوونی دووەمدا لە کەرتی غەززە ڕاگەیاندرا و، سەرلەنوێ دەستی بە هێرش و پەلامارە تەندەکانی کردەوە، لە ئاکامی ئەو هێرشانەشدا زیاتر لە ٨٣٠ کەس گیانیان لەدەستداوە کە زۆربەیان کەسانی بەتەمەن و ژن و منداڵن و، هەزار و ٦٦٣ کەسیش برینداربوون.

هاوکات ژمارەی ئەو کەسانەی لە ئاکامی هێرشەکانی ئیسرائیلدا کە لە حەوتی تشرینی یەکەمی ٢٠٢٣ەوە هەتا ئێستا دەیکاتە سەر کەرتی غەززە گیانیان لەدەستداوە، بەرزبووەتەوە بۆ ٥٠ هەزار و ١٨٣ کەس و، ژمارەی بریندارانیش گەیشتووەتە ١١٣ هەزار و ٨٢٨ کەس.