ئیستانبوڵ - AA

سەرۆکی ئەنجوومەنی کارگێڕی و بەڕێوەبەری گشتیی ئاژانسی ئانادۆڵو، سەردار کاراگۆز ڕایگەیاند: "وەک ئاژانسی ئانادۆڵو کاردەکەین بۆ دابینکردنی دەستڕاگەیشتن بە زانیاری جێ متمانە و بینینی ڕۆڵێکی هاوسەنگ کردن لە بازاڕەکانی وزەی جیهانیدا. لەم چوارچێوەیەدا پلاتفۆرمی هەواڵی 'تێرمیناڵی وزەی ئاژانسی ئانادۆڵو'مان کردەوە".

لە دانیشتنی سەرەکی کۆڕبەندی وزەی ئیستانبوڵدا کە لەلایەن ئاژانسی ئانادۆڵو و بە سەرپەرشتی وەزارەتی وزە و سەرچاوە سروشتییەکانی تورکیا بە تەوەری "ئایندەی هاوبەش، ئامانجی هاوبەش" ڕێکخراوە، کاراگۆز گوتارێکی پێشکەش کرد.

لە گوتارەکەیدا کاراگۆز باسی لەوە کرد کۆڕبەندەکە بڕیاردەرانی وڵاتانی جیاواز، نوێنەرانی کەرتەکە، پسپۆڕان و میدیاکارانی نیشتمانیی و نێودەوڵەتیی کە لە نزیکەوە چاودێری کەرتی وزە دەکەن کۆکردووەتەوە.

کاراگۆز ئاماژەی بەوە کرد کە وەک ئاژانسی ئانادۆڵو کاردەکەن بۆ دابینکردنی دەستڕاگەیشتن بە زانیاری جێ متمانە و بینینی ڕۆڵێکی هاوسەنگ کردن لە بازاڕەکانی وزەی جیهانیدا و، ڕایگەیاند: "لەم چوارچێوەیەدا پلاتفۆرمی هەواڵی 'تێرمیناڵی وزەی ئاژانسی ئانادۆڵو'مان کردەوە".

ڕاشیگەیاند: "پلاتفۆڕمەکەمان کە بە زمانەکانی ئینگلیزی و تورکی پەخش دەکات، بەبێ ئەوەی بکەوێتە ژێر کاریگەری گرووپە بەرژەوەندیخوازەکان و ئەکتەرە جیهانییەکانەوە، گشت پێشهاتەکانی پەیوەست بە کەرتەکە بە جیهان دەگەیەنێت".