ئیستانبوڵ ــ AA

ئەندامی ئەنجوومەنی سیاسیی حووسییەکان، محەمەد عەلی حووسی ھەڕەشەی ئەوەی کرد ئەگەر دەستدرێژییەکان بۆ سەر یەمەن بەردەوام بن، ئەوا بەرژەوەندییەکانی ئەمریکا لە ناوچەکە دەکەنە ئامانج.

محەمەد عەلی حووسی لە گرتەیەکی ڤیدیۆییدا کە لە ھەژماری خۆی لە تۆری کۆمەڵایەتی ئێکس، بڵاوی کردووەتەوە تیایدا ڕایگەیاندووە: "ھۆشداری دەدەینە ئەمریکییەکان ئەگەر یەمەن بکەنە ئامانج، ئەوا ئێمەش بەرژەوەندییەکانیان لە ناوچەکە دەکەینە ئامانج".

ئاماژەی بەوەشداوە: "ئەگەر دەستدرێژییەکانى سەر غەززە و یەمەن ڕانەوەستێندرێن، ئەوا لە بەرامبەردا ئامانجە گرنگەکانی ئەمریکا لە ناوچەکە دەکەینە ئامانج و تەنانەت چەکدارەکانمان لەوبارەیەوە ئاگادارکردووەتەوە".

ئەمەش دوای ئەوە دێت کە لە چەند ڕۆژی رابردوودا سەرۆکوەزیرانی ئیسرائیل، بنیامین ناتانیاھو و وەزیری بەرگریی ئیسرائیل، یسرائیل کاتز ھەڕەشەیان ئەوەیان کردبوو کە گورزی توندتر لە حووسییەکان دەوەشێنن، ئەوەش لە وەڵامی ئەو مووشەکانەی کە لەلایەن حووسییەکانەوە ئاراستەی قوڵایی خاکی ئیسرائیل دەکرێن.