نیویۆرک ــ AA

نەتەوە یەکگرتووەکان ڕایگەیاند کە دۆخی ژیان لە غەززە کوشندەیە و ھاووڵاتییانی فەڵەستینی لەبەر چاوی جیھاندا لە برسا دەمرن.

گوتەبێژی سکرتێری گشتیی نەتەوە یەکگرتووەکان، ستیفان دوجاریک لە کۆنگرەیەکی ڕۆژنامەوانییدا ڕایگەیاند کە ماوەی یەک مانگە، باکوری غەززە لە ژێر گەمارۆدانی ئیسرائیل دایە.

باسی لەوەش کرد دۆخی ژیان لە غەززە کوشندەیە و ھاووڵاتییانی فەڵەستینی لەبەر چاوی جیھاندا لە برسا دەمرن و جەختیشی لەوە کردەوە کە پێویستە شەڕ لە غەززە بوەستێندرێت.

ستیفان دوجاریک لەبارەی دۆخی ئێستای کەناری ڕۆژئاوای داگیرکراو و قودسی ڕۆژھەڵات ئاماژەی بەوەشدا کە لە میانی ئەمساڵدا، ھەزار خانووی فەڵەستنی لە ناوچەکانی کەناری ڕۆژئاوای داگیرکراو و قودسی ڕۆژھەڵات، خاپووکراون.

ھەروەھا ڕاشیگەیاندووە کە ھەر لە میانی ئەمساڵدا، ھەزار و ١٠٠ کەس بە زۆرەملێ لە ناوچەکانی کەناری ڕۆژئاوا کۆچیان کردووە کە لە سەدا ٤٠ یان دانیشتووی قودسی ڕۆژھەڵات بوون.