ھەولێر ــ AA

شانەی ڕاگەیاندنی ئەمنی عێراق ڕایگەیاند کە سێ مووشەکی کاتیۆشا لە گەراجێکی تایبەت بە وەستاندنی ئۆتۆمێلەکانی فەوجی دوو سەربە دەزگای دژەتیرۆر و فڕۆکەخانەی نێودەوڵەتی بەغدا کەوتوونەتە خوارەوە.

شانەی ڕاگەیاندنی ئەمنی لە ڕاگەیاندراوێکدا کە لە زمانی سەرچاوەیەکی ئەمنییەوە بڵاوی کردەوە، ڕایگەیاندووە، "کاتژمێر ٠٠:٢٠ بەرەبەیانی ١ی تشرینی یەکەمی ٢٠٢٤، دوو مووشەکی کاتیۆشا لە گەراجێکی تایبەت بە وەستاندنی ئۆتۆمبێلەکانی فەوجی دوو سەربە دەزگای دژەتیرۆر و مووشەکێکی دیکە لە گۆڕپانیکدا لەناو فڕۆکەخانەی نێودەوڵەتی بەغدا کەوتوونەتە خوارەوە، بەڵام زیانی گیانییان نەبووە".

ڕاشیگەیاندووە: "دوای ھێرشەکە، ھێزە ئەمنییەکان لە میانی ئۆپەراسیۆنێکدا لە ناوچەی عامرییە ڕۆژئاوای بەغدا، دەستیان بەسەر ئۆتۆمبێلێکی بارھەڵگردا گرتووە کە ژمارەیەک مووشەکی تیایدابوو کە ئامادەکرابوون، بۆ ئەوەی ئاراستە بکرێن".

باسی لەوەش کردووە کە مووشەکەکان، لەلایەن شارەزایانی پووچەڵکردنەوەی بۆمبەوە، پووچەڵکراونەتەوە.