سەرۆکوەزیرانی عێراق و سەرکۆماری ئێران پێشھاتەکانی ناوچەکە و دۆخی سووریایان تاوتوێ کرد
سەرۆکوەزیرانی عێراق، محەمەد شیاع سوودانی و سەرکۆماری ئێران، مەسعود پزیشکیان ھاریکاریی و ھەماھەنگییەکانی نێوان ھەردوو وڵاتیان سەبارەت بە پێشھاتەکانی ناوچەکە، بەتایبەت دۆخی سووریا تاوتوێ کرد.
Arbil
ھەولێر ــ AA
سەرۆکوەزیرانی عێراق، محەمەد شیاع سوودانی لە میانی سەردانەکەی بۆ تاران لەگەڵ سەرکۆماری ئێران، مەسعود پزیشکیان کۆبووەوە.
نووسینگەی ڕاگەیاندنی سەرۆکوەزیرانی عێراق ڕاگەیاندراوێكی لەبارەی ناوەرۆکی کۆبوونەوەکەی نێوان محەمەد شیاع سوودانی و مەسعود پزیشکیان بڵاوکردەوە.
بەپێی ڕاگەیاندراوەکە لە کۆبوونەوەکەدا پەیوەندییەکانی نێوان عێراق و ئێران و گرنگی بەردەوامی ھاریکارییە ھاوبەشەکان لە چوارچێوەی ڕێککەوتن و لێکتێگەیشتنی دوولایەنە و پەرەپێدان بە ھاوبەشی بونیادنەرانەی نێوان ھەردوو وڵات، تاوتوێ کراوە.
ڕاشیگەیاندووە کە لە تەوەرێکی کۆبوونەوەکەدا، گفتوگۆکراوە لەبارەی ھاریکاریی و ھەماھەنگییەکانی نێوان ھەردوو وڵات سەبارەت بە پێشھاتەکانی ناوچەکە، بەتایبەت دۆخی سووریا و لەوبارەیەوە جەخت کراوەتەوە لەسەر ئەوەی کە پێویستە ھەوڵ بدرێت لە پێناو چەسپاندنی ئاسایش و سەقامگیریی و پاراستنی یەکپارچەیی خاکی سووریا.
ئەوەشی خستووەتەڕوو کە لە میانی کۆبوونەوەکەدا، بەردەوامی دەستدرێژییەکانی ئیسرائیل بۆ سەر گەلی فەڵەستین لە کەرتی غەززە خراوەتە بەرباس.
ھەروەھا ڕاشیگەیاندووە کە لە کۆبوونەوەکەدا، محەمەد شیاع سوودانی جەختی کردووەتەوە لەسەر ئەوەی کە عێراق بەردەوامە لە ھەوڵەکانی لەگەڵ ئێران و وڵاتانی عەرەبیش، بە مەبەستی سەپاندنی ئارامی و سەقامگیریی لە سەرانسەری ناوچەکەدا.
