Anadolu Ajansı © 2026
САРАЕВО
Нихад Аличковиќ од движењето „АнтиДајтон“ ги повика граѓаните и семејствата на жртвите со доказни материјали да помогнат во расветлувањето на вистината за снимката од снајперското гнездо во сараевската населба Неџаричи и казнување на снајперистите кои сееја смрт за време на опсадата на главниот град на Босна и Херцеговина, јавува Агенција Анадолија (АА).
Токму Аличковиќ преку социјалните мрежи во јавноста неодамна ги пушти снимките на францускиот репортер Филип Буфон на кои се гледа како снајперист го испукува куршумот, а потоа со другиот актер на снимката потврдува дека цивил е убиен откако бил погоден во главата.
Обвинителството на Босна и Херцеговина соопшти дека се собрани сите достапни снимки и фотографии и дека во Посебниот оддел за воени злосторства е формиран предмет во рамките на кој ќе се испитаат сите околности, факти и наводи за снајперското дејствување од наведената локација врз цивилите на подрачјето на сараевската населба Алипашино Поле.
Во разговор со новинарот на АА, Аличковиќ изјави дека Одделот за воени злосторства при Федералното МВР ја предал пријавата за злосторство против цивилното население за кое товари два идентификувани и уште неколку неидентификувани лица од снимката.
„Јас и ги пуштив тие снимки во јавноста затоа што претходните снимки на авторот, францускиот репортер Филип Буфон, ги гледав одамна, уште пред десет години и тогаш следев бидејќи тој одвреме-навреме објавува некои снимки. На 10 мај првпат објави дел од снимките на кои се гледа како Зоран Кулина пука во правец на зградите и објектите каде што беше сместено цивилното население во опколеното Сараево. Тогаш се вратив назад и се присетив на тие негови снимки, на неговото доаѓање до локацијата во Неџаричи каде што се наоѓаа снајперистите“, изјави Аличковиќ.
Истакнувајќи дека снимката предизвикала голем број коментари и реакции од јавноста со оглед на тоа дека се работи за снимка од снајперско гнездо од кое страдале многу цивили, вклучувајќи и деца во опколеното Сараево, Аличковиќ изјави дека започнале да му се јавуваат и членови на семејствата на настраданите лица.
„Многу деца се тука ранети, дури и најмногу деца се погодени тука, така што и тоа е еден од доказите дека тука немало, апсолутно и дефинитивно, никаква борбена линија. Тоа не беа никакви прекршоци, ниту тоа беше прва линија каде што се воделе борби на Армијата на Република БиХ и т.н. Војска на Република Српска. Така што, дефинитивно, пушката од снајперското гнездо од Неџаричи е вперена во цивилите и цивилните објекти“, изјави Аличковиќ.
Потсетувајќи дека Станислав Галиќ е осуден за злостороствата извршени за време на опсадата на Сараево, но дека ни во неговата пресуда нема снајперско дејствување и дека снајперистите и понатаму се неосудувани за извршените злосторства, тој изрази надеж дека овој случај со снајперистите од Неџаричи конечно ќе го отвори тоа прашање.
„Најлошиот проблем и најголемиот апсурд за мене е што, за жал, за директните извршители се суди според командните одговорности и некои поединци, а најголемиот број на директни извршители на злосторства и воени злосторства, па дури и оние кои учествуваа во геноцидот, шетаат слободно“, рече Аличковиќ.
Тој понатаму рече дека му е јасно дека е тешко да се дојде до идентитетот и да се докажат постапките на сите снајперисти кои ординираа околу Сараево за време на неговата опсада, но дека тоа е сè уште можно и дека материјалите во Хашкиот трибунал може да помогнат во тоа.
„Јас предложив веќе една помала иницијатива да се обидеме на одреден начин да дојдеме до тие дневници, до тие доказни материјали во кои се воделе смените на снајперистите околу Сараево, за да дојдеме и до овие останати лица кои се наоѓаат на снимката на Филип Бугон како снајперисти во Неџаричи“, изјави Аличковиќ.
Повикувајќи ја јавноста и здруженијата на жртвите и боречките здруженија со доставување докази да помогнат на истражните органи задолжени за расветлувањата на злосторствата од периодот на опсадата на Сараево, Аличковиќ изјави дека дејствувањето на поединците како што е режисерот Авдо Хусеиновиќ може да резултира со откривање и процесуирање на злосторствата, но дека треба да се работи и институционално.
„Особено сега кога Обвинителството формира предмет во овој случај, ги повикувам сите семејства на сите убиени жртви на просторот каде што дејствувал снајперистот и неговите колеги од Неџаричи низ Војничкото и Алипашино Поле да ни се јават, евентуално на Обвинителството, да бараат правда за своите членови на семејството“, изјави Аличковиќ и додаде дека е на располагање такви доказни материјали да проследи до надлежното Обвинителство.
Аличковиќ е во контакт со авторот на видеоснимката, Филип Буфон, и се обидел да дојде до детали за оваа снимка, но францускиот репортер одбил да даде какви било информации и од интернет ги отстранил снимките кои претходно ги објавувал.
„Одговара со некакви свои нелогични искрени и апсурдни пораки во кои нѐ повикува да престанеме да се занимаваме со тоа, дека по 27 години не треба да размислуваме за тоа, дека треба да одиме понатаму. Па еве, јас и овој пат го прашувам, ако ние треба да го заборавиме сето тоа, зошто тогаш тој ги објавил тие свои снимки кои тогаш ги направил, кои будат сеќавања на сето она што се случуваше за време на опсадата на Сараево и општо во БиХ. Ако треба да заборавиме и ако не треба да се занимаваме со тоа, зошто тој објавува снимки и се занимава со нив и заработува пари преку „Јутјуб“ врз основа на нашите жртви, нашите страдања, болка“, изјави Аличковиќ.
Истакнувајќи дека авторот Буфон и понатаму е со ставот дека не сака да открива детали за снимката со снајперистот, Аличковиќ изјави дека од надлежните истражни институции побарал да го контактираат Буфон и да дојдат до потребните информации за расветлување на целиот случај.
Опсадата на Сараево која започна на 5 април 1992 година и траеше 44 месеци или вкупно 1.425 дена, е најдолга опсада на еден град во модерната историја. За време на опсадата се убиени 11.541 граѓанин на Сараево, вклучувајќи 1.601 дете.
news_share_descriptionsubscription_contact
