Белград: Вучиќ и Бајрамов разговараа за економската соработка и инфраструктурните проекти

БЕЛГРАД (АА) - Претседателот на Република Србија, Александар Вучиќ, денес го прими министерот за надворешни работи на Република Азербејџан, Џејхун Бајрамов, пренесува Анадолу.

Како што соопшти Службата за соработка со медиумите, претседателот на Србија, Вучиќ, и Бајрамов со задоволство констатирале дека билатералните односи се на многу високо ниво, втемелени на традиционално пријателски врски, меѓусебна доверба и приврзаност кон почитувањето на основните принципи на меѓународното право.

„Претседателот Вучиќ изрази посебна благодарност за недвосмислениот став на Република Азербејџан по прашањето на територијалниот интегритет и суверенитет на Република Србија“, се наведува во соопштението.

Пренесувајќи ги поздравите на претседателот Илхам Алиев, Бајрамов ја изрази својата почит за независната надворешна политика на Србија, како и за одличните резултати во економијата.

„Во текот на средбата стана збор и за економската соработка меѓу двете земји, за што би придонело и отворањето редовна авиолинија меѓу Белград и Баку“, се наведува во соопштението.

Вучиќ и Бајрамов разговарале и за енергетската ситуација. По тој повод Вучиќ укажал на тоа дека Србија со изградбата на гасната интерконекција со Бугарија, станува дел од Јужниот гасен коридор и дека договорот за купување гас од Азербејџан ќе ѝ помогне да ја осигури својата енергетска безбедност.

Вучиќ изрази надеж дека претседателот Алиев ќе ја посети Србија по повод завршувањето на работите на гасниот интерконектор Србија - Бугарија. Во таа прилика би се одржал и состанок на Советот за стратешко партнерство на Србија и Азербејџан, што би дал нови можности за остварување на клучните заеднички интереси на двете земји.