Бројот на жртви од западнонилска треска во Северна Македонија се искачи на четири

Бројот на жртви од западнонилска треска во Северна Македонија се искачи на четири, соопшти директорот на ЈЗУ Универзитетска клиника за инфективни болести и фебрилни состојби, Фадил Цана, јавува Анадолу.

Цана во изјавата за медиумите информираше за состојбата со западнонилска треска во земјава.

„Уште еден пациент во тешка здравствена состојба, кај кој претходно лабораториски беше потврдена невроинвазивна форма на западнонилска треска, почина на Универзитетската клиника за инфективни болести и фебрилни состојби“, информираше Цана.

Тој рече дека се хоспитализирани 20 пациенти, од кои два случаја се водат клинички како суспектни, а пет пациенти се на интензивна нега.

Цана посочи дека 76-годишниот пациент се лекувал 27 дена на клиниката, но починал поради тешката невроинвазивна форма на болеста и сериозните придружни заболувања.

Тој додаде дека од западнонилска треска во земјава 15 пациенти се излекувани и отпуштени од клиниката.

- Западнонилски вирус -

За заштита од западнонилскиот вирус, кој најчесто се пренесува преку убод од комарци од родот цулекс, нема достапна вакцина, а се препорачува заштита од убоди од комарци.

Се наведува дека инкубацискиот период од моментот на убодот од комарецот трае од два до 14 дена, а кај лицата со ослабен имунитет овој период може да се продолжи до 21 ден.

Се посочува дека кај околу 80 отсто од лицата заразени со вирусот не се појавуваат никакви симптоми, а кај приближно 20 отсто од пациентите може да се појават симптоми како треска, слабост, гадење и повраќање, главоболка и болки во мускулите.

Случаи на зараза со западнонилски вирус најчесто се регистрираат во Африка, Европа, Блискиот Исток, Северна Америка и Западна Азија.