БЕЛГРАД (АА) - Претседателот на Србија, Александар Вучиќ, и премиерот на Грција, Кирјакос Мицотакис, денес се сретнаа во Белград, главниот град на Србија. Во текот на средбата разговарале за унапредувањето на билатералните односи во бројни области, меѓу кои се и енергетиката и инфраструктурата, известува Анадолу.
Во Белград денес се одржаа и пленарни разговори на делегациите на Република Србија и Република Грција, предводени од Вучиќ и Мицотакис.
На конференцијата за новинарите со Мицотакис, Вучиќ рече дека е среќен што Србија и Грција негуваат добри пријателски и братски односи и што разговарале за сите аспекти на билатералната соработка.
Претседателот на Србија рече дека оваа година двете земји ја одбележуваат 145-годишнината од воспоставувањето на билатералните односи, и дека очекува дека ова ќе биде важна година со огромен раст на економските односи и трговската соработка, но и година во која ќе се одржи четвртиот совет за соработка меѓу двете земји.
„Србија и Грција отсекогаш меѓусебно го поддржувале територијалниот интегритет една на друга. Верувам дека така ќе биде и во иднина“, рече Вучиќ.
Според неговите зборови, Грција е еден од значајните, важни и најголеми искрени поддржувачи на Србија на нејзиниот европски пат.
Тој посочи дека му рекол на Мицотакис дека Србија е цврсто посветена на забрзување на европскиот пат, но оти од Европа очекува јасни сигнали на поддршка.
„Реков дека Србија е цврсто решена да го продолжи и забрза својот европски пат, дека сме благодарни на Грција за таа поддршка и дека тоа не е само формална реченица што ја кажуваат политичарите, туку дека тоа е од суштинско значење за нашата земја“, нагласи Вучиќ.
Тој додаде дека исто така рекол дека разбира оти во Европа не се секогаш задоволни од сите потези на Србија, но дека и во Европа треба да разберат дека од неа очекуваат јасни сигнали на поддршка за Србија на нејзиниот пат.
Вучиќ нагласи и дека со Мицотакис разговарал и за агендата ЕКСПО 2027 година.
„Му реков на премиерот Мицотакис дека нашата цел, нашиот сон е крајот на 2027 година да го дочекаме со вкупна вредност на бруто-домашниот производ од 100 милијарди евра. За тоа ни е потребна и поддршката од нашите грчки пријатели. Горд сум на денешниот српско-грчки бизнис-форум“, рече Вучиќ.
Тој ги поздрави сите грчки компании кои сакаат да работат и да заработат во Србија, а кои можат да помогнат, бидејќи Србија нема капацитет да го изведе сѐ она за што обезбедиле пари.
„Значи, звучи парадоксално, Србија нема проблем со парите. Имаме проблеми со капацитетите како да градиме, како да правиме сѐ за што обезбедивме пари“, рече Вучиќ.
Во тој контекст, тие разговарале за темите енергетика, нафтоводи, гасоводи, набавка на гас, до обновливи извори на енергија, како и за транспортната инфраструктура.
Премиерот на Грција рече дека имале значајни разговори и дека има видлив напредок во односите меѓу двете земји. Тој посочи дека денеска на бизнис-форумот ќе ја потврди определбата за соработка на сите полиња, информирајќи дека во Србија се дојдени четворица министри и голема бизнис-заедница.
Мицотакис рече дека сакаат подобро да ги поврзат Белград и Солун.
„Во таа насока мораме да ги искористиме европските фондови кои се наменети за Западен Балкан. Мојата татковина го охрабрува и практичното учество на Европската Унија во развојот на инфраструктурата на Србија и сите други земји на полуостровот, бидејќи тоа регионално поврзување, кое пред сè ги поврзува граѓаните, е еден од најважните начини што ги води кон европска експанзија“, рече Мицотакис.
Тој посочи дека ја прошируваат соработката во енергетскиот сектор и безбедноста.
Според него, Грција ќе продолжи да го поддржува европскиот пат на Србија и убеден е дека е неопходно Белград да ги искористи позитивните околности во европската процедура.
„Има европска иднина за Србија и Западен Балкан, а за нас нема иднина без Западен Балкан и Србија. Анексијата на целиот Западен Балкан е наша стратешка цел, а со забрзување на реформите што ги спроведувате во вашата земја, вие побргу ќе се приближите до ЕУ“, рече грчкиот премиер.
Тој додаде дека ставот на Грција во однос на Косово останува непроменет.
„Сметаме дека европското посредување и дијалог се единствениот начин за нормализирање на односите меѓу двете страни и значително ќе помогне за стабилноста во регионот, што е цел на сите нас“, додаде Мицотакис.
