Shpetim Hiseni
16 Октомври 2026•Ажурирано: 16 Октомври 2026
Претседателот на Собранието на Северна Македонија, Африм Гаши, ја истакна важноста на силните институции и улогата на парламентите во обезбедувањето доследна примена на меѓународното право, во време на зголемена неизвесност и сложени геополитички, безбедносни и економски предизвици, пренесува Анадолу.
Според соопштението од Собранието, Гаши го истакнал ова во своето обраќање на Конференцијата на претседателите на парламентите и генералните секретари на земјите членки на Советот на Европа, што на 15 и 16 октомври се одржува во Рим, на тема „Обновување на меѓународниот поредок заснован на правила: улогата на парламентите во справувањето и одговарањето на современите кризи“.
Пред своите колеги, Гаши нагласи дека меѓународното право е клучен предуслов за зачувување на мирот и стабилноста, заштита на суверенитетот и правата на државите, како и воспоставување јасни правила во меѓународните односи.
Тој ја истакна улогата на парламентите во демократскиот надзор, легитимирањето на меѓународните обврски и поттикнувањето на дијалогот и соработката.
Осврнувајќи се на улогата на Советот на Европа, Гаши го истакна придонесот на Организацијата во унапредувањето на човековите права, демократијата и владеењето на правото. Тој ја нагласи и важноста на парламентарната дипломатија за зајакнување на меѓусебната доверба, продлабочување на меѓупарламентарниот дијалог и развивање долгорочни партнерства засновани на соработка и меѓусебно почитување.
Гаши ја истакна и важноста на регионалната соработка и координираните активности за зајакнување на колективната отпорност и справување со заедничките безбедносни, економски и социјални предизвици.
Тој заклучи дека преку отворен дијалог, размена на искуства и меѓусебна поддршка, парламентите можат да придонесат за обезбедување траен мир и стабилност, како и одржлив развој во интерес на граѓаните.
