Експлозија во Митровица, косовскиот министер тврди дека станува збор за освета поради апсењето неколкумина Срби

ПРИШТИНА (АА) - Силна експлозија одекна синоќа во Северна Митровица, а косовскиот министер за внатрешни работи Џељаљ Свечла го поврза случајот со неодамнешното апсење на тројца Срби осомничени за воени злосторства врз цивилното население во Косово, јавува Анадолу.

Рачна граната била фрлена во населбата Бошњачко мало, една од мешаните населби во Митровица на северот на Косово, каде што живеат и Срби и Албанци.

Свечла во објавата на социјалните мрежи рече дека вистината за злосторствата извршени за време на војната во Косово ќе биде откриена докрај, а фрлањето воени рачни бомби од криминални групи не може да ја попречува правдата.

Тој рече и дека надлежните единици на косовската полиција, по долг ангажман и со основани сомневања, уапсиле тројца државјани од српска националност за злосторства извршени врз цивилното население за време на војната во Косово, осомничени дека биле „соучесници во тортури, рани, убиства, депортации и масакри на Албанци во Вучитрн, околните села и затворот во Смрековница“.

„Во знак на револт против апсењето на овие лица, како порака до нашето правосудство и со цел да се тероризираат нашите граѓани, синоќа криминалните групи фрлија воена рачна бомба во Бошњачко мало“, напиша Свечла.

Косовскиот министер го обвини српскиот претседател Александар Вучиќ дека го „инспирирал, поддржувал и наредил ова кривично дело“.

„Србија изврши геноцид на Косово. Србија на чело со Вучиќ не само што не го прифаќа овој факт туку ги велича воените злосторници. Доказ за нејзината непроменета позиција е самото планирање на чинот на фрлање на бомбата“, додаде косовскиот министер.

Свечла на крајот рече дека Косово „ќе биде правна држава, на еднакви граѓани, каде што еднаквоста и просперитетот ќе бидат гарантирани за сите“.

По повод овие апсења, кои на 20 септември ги изврши косовската полиција по налог на Специјалното обвинителство, реагираа партијата Српска листа, но и Канцеларијата за Косово во Владата на Србија. Како што наведоа, апсењата биле политички мотивирани.

На тројцата приведени Срби им е изречена мерка притвор од еден месец.