Зибери: „Функцијата народен правобранител мора да го добие соодветното место во системот“

СКОПЈЕ

Во Собранието на Република Северна Македонија, новоизбраниот народен правобранител, Насер Зибери, даде свечена изјава пред претседателот на Собранието, Талат Џафери, и генералната секретарка на Собранието, Цветанка Иванова, јавува Агенција Анадолија (АА).

По приемот во Собранието и свечената изјава, Зибери за медиумите изјави дека неговиот досегашен ангажман е доволна гаранција за успешно извршување на функцијата за која е избран, согласно законот и Уставот, и притоа потенцираше дека функцијата народен правобранител е важна за Уставот и граѓаните на државата.

„Јас уште кога одлучив да се кандидирам за оваа функција се разбира дека имав свои гледишта и визија за функцијата народен правобранител и таа визија ќе се обидам до крај да ја наметнам и реализирам, а тоа значи во прв план оваа функција мора да го добие соодветното место во системот, како што налагаат Уставот и законите. Тоа е прво. Второ, мора граѓаните да имаат доверба во институцијата, а доверба ќе имаат доколку институцијата возврати со соодветен ангажман и заштита на слободите и правата на граѓаните“, изјави Зибери.

Како што рече тој, во оваа определба ќе настојува да има непосредна комуникација со јавноста.

„Во оваа определба ќе ги искористам сите правни инструменти, но и инструменти кои значат непосредна комуникација со јавноста, упатувајќи порака до органите на управата и другите носители на јавни функции дека функцијата народен правобранител не е само декор во системот, туку и одбрана, бедем и заштита на слободата и правата на граѓаните“, истакна Зибери.

Потсетуваме, на 25 јануари оваа година Собранието на Република Северна Македонија го избра Насер Зибери за народен правобранител.

Зибери е правник, поранешен пратеник и министер, работел како нотар, а во јули минатата година беше кандидат за премиер на Северна Македонија од партијата Демократска унија за интеграција (ДУИ), која го предложи за функцијата народен правобранител.