Zylfije Adem Jakupi
26 Февруари 2021•Ажурирај: 27 Февруари 2021
ПРИШТИНА
Во почетокот на следната недела се очекува објавување на конечните резултати од предвремените парламентарни избори во Косово одржани на 14. февруари, изјави портпаролот на Централната изборна комисија (ЦИК) Валмир Елези, известува Агенција Анадолија (АА).
Елези во изјава за медиумите во Центарот за пребројување и резултати во Косово Поле нагласи дека ЦИК напорно работи на што поскоро заклучување на активностите што се одвиваат во овој центар за да можат да се објават конечните резултати од изборите.
Тој нагласи дека во Центарот во моментов се одвива пребројување на гласовите од 552 гласачки места за што претходно одлучил ЦИК. Досега се обработени 377 избирачки места или 70% од материјалот. Исто така се врши и проценка на наводни пакети на гласачки ливчиња кои пристигнале надвор од Косово.
„Две активности се во тек во Центрот за пребројување и резултати, пребројување на гласови и оценка на пакетите за кои се претпоставува дека се гласови што пристигнале во Косово од странство. Можеме да кажеме дека овие активности се при крај и очекуваме да завршат во сабота. Тоа ќе ни овозможи да започнеме со броењето на условните гласови и гласовите пристигнати по пошта. Потоа и по сите останати процедури во Центарот, ЦИК може да ги прогласи конечните резултати од изборите одржани на 14. февруари. Веруваме дека тоа може да се случи во почетокот на следната недела“, рече Елези.
Портпаролот на ЦИК додаде дека од 43.500 пристигнати пакети по пошта, досега се отворени 41.236 наводни пакети со гласачки ливчиња, од кои се одбиени 18.876 коверти. Причини за нивно неодобрување се различни. Како прво, ковертите биле испраќани од лица кои не се регистрирани како гласачи надвор од Косово, некои лица гласачките ливчиња ги праќале по двапати, имало и случаи на испраќање ливчиња од страна на неидентификувани гласачи, а во коверт својот глас го испраќале и гласачи кои приложиле невалидни лични документи.
На изборите на 14. февруари право на глас имаа 1.794.862 граѓани, а гласаа повеќе од 800.000 гласачи или околу 47%.
