Министерката за одбрана Петровска во посета на Словенија

СКОПЈЕ (АА) - Министерката за одбрана на Северна Македонија, Славјанка Петровска, ја започна дводневната официјална посета на Словенија на покана на министерот за одбрана на оваа земја, Марјан Шарец, јавува Агенција Анадолија (АА).

Според соопштението на Министерството за одбрана на Северна Македонија, по пречекот со воени почести во словенечкото Министерство за одбрана, министерката Петровска и нејзиниот словенечки колега Шарец одржале средба.

Во соопштението се вели дека на средбата била потврдена заедничката заложба за посилна одбранбена соработка бидејќи, како што се наведува во соопштението, двете држави споделуваат заеднички вредности и иста цел – стабилен, мирен и безбеден регион со сигурна европска иднина.

„Словенија е наш докажан пријател, сојузник и гласен поддржувач на евроинтеграцијата на Северна Македонија. Оваа година одбележуваме 30 години соработка помеѓу двете држави и 28 години одбранбена соработка која остави белег на развојот на одбраната и Армијата. Живееме во комплексни времиња со бројни безбедносни предизвици и затоа како блиски и пријателски земји, и како сојузници во НАТО, мораме да опстанеме на нашиот пат кон уште посилна, уште поинтензивна одбранбена соработка“, рече Петровска по денешната средба со словенечкиот колега Марјан Шарец во Љубљана.

На средбата Петровска ја изрази својата благодарност за несебичната, конзистентна и гласна поддршка од страна на Словенија во поглед на пристапувањето во ЕУ, но и за експресната реакција и материјална и техничка помош од страна на Словенија при справувањето со пожарите минатата година.

„Балканот, особено Западниот Балкан мора да опстане на патот кон целосна демократизација и силна европеизација – пат кој е нераскинливо поврзан со пристапувањето кон Европската Унија. Овој пат мораме да го минеме ефикасно и квалитетно и словенечката поддршка во тој правец е секогаш присутна и исклучително важна, за што искрено ви се заблагодарувам“, подвлече Петровска.

Во контекст на регионалната безбедност која е приоритет и за Северна Македонија и за Словенија, Петровска порача дека регионот се соочува со свои предизвици, но ниту еден предизвик не е нерешлив доколку има политичка волја, храброст и насоченост кон иднина на соработка и просперитет.

„Традиционалните недоразбирања и историски предрасуди за жал сè уште не се целосно затворени и оставени во минатото. Решавањето на отворените билатерални прашања во регионот е клучно за подобрување на заедничката безбедност, но и европската стабилност. Примерот на Северна Македонија во овој поглед треба да биде искористен како позитивен патоказ“, рече Петровска.

Министрите на средбата се заложија за уште посилна соработка во областа на одбраната, при што министерката Петровска повика на интензивирање на заедничките вежби и обуки на армискиот полигон „Криволак“, склучување на договор за одбранбена соработка со цел развој на одбранбени капацитети и планирање, справување со кибер, хибридни и асиметрични закани.

Петровска и Шарец разговараа и за соработката во контекст на НАТО – мисиите, односно за заедничкото учество во т.н. Зајакнато истурено присуство во Латвија, каде македонските мировници се дел од словенечкиот контингент. Тие се согласија дека улогата на НАТО е јасна и прецизна – тоа е одбранбена Алијанса чија основна цел е безбедност на секоја педа НАТО-територија.

Денеска во Љубљана, министерката Петровска се сретна и со претседателот Борут Пахор.

Петровска ќе се обрати и на церемонијата за примопредавање на нов музејски експонат, германски противвоздушен топ од Втората светска војна, донација од Северна Македонија во Паркот за воена историја Пивка, а утре ќе присуствува на воена вежба што ќе се реализира во Воздухопловната база во Церкље об Крки.