Осудениот воен злосторник Младиќ закопан со воени почести во Белград
- Неколку илјади луѓе се собраа пред црквата Свети Лука во белградската населба Видиковац за да му оддадат почит на воениот злосторник Младиќ
Осудениот воен злосторник Ратко Младиќ, поранешен командант на Војската на Република Српска, кој отслужуваше доживотна казна затвор за геноцид и други воени злосторства во Хаг, беше закопан денес на гробиштата Топчидер во Белград со воени почести, јавува Анадолу.
Опелото го предводеше патријархот на Српската православна црква, Порфирије, а чиноначалствуваа повеќе владици на Српската православна црква, по што поворката се упати кон гробиштата Топчидер во српскиот главен град, каде што беше закопан со говори и огнено оружје.
Неколку илјади луѓе се собраа пред црквата Свети Лука во белградската населба Видиковац за да му оддадат почит на воениот злосторник Младиќ.
Меѓу собраните беа одредени српски министри, лидерот на владејачката коалиција во босанско-херцеговскиот ентитет Република Српска, Милорад Додик, членката на Претседателството на БиХ, Жељка Цвијановиќ, и бројни други претставници на власта и опозицијата.
Во саботата во Домот на Војската на Србија во Белград се одржа комеморација за осудениот воен злосторник, поранешен командант на Главниот штаб на Војската на Република Српска, кој почина на 27 август во притворската единица на Меѓународниот резидуален механизам за кривични трибунали (ММКС) во Хаг, каде што отслужуваше доживотна казна затвор.
Младиќ беше правосилно осуден на доживотен затвор во јуни 2021 година со конечна и обврзувачка пресуда за геноцидот во Сребреница, прогонот на Бошњаците и Хрватите, тероризирањето на населението во Сараево и земањето на припадници на УНПРОФОР како заложници.
Неговата смрт предизвика бројни реакции во Босна и Херцеговина, Србија и меѓународната заедница. Европската комесарка за проширување Марта Кос ја откажа планираната посета на Србија, велејќи дека величењето на Младиќ е некомпатибилно со европските вредности и процесот на соочување со минатото.
На 3 септември, Меѓународниот резидуален механизам за кривични трибунали им ги предаде останките на Младиќ на неговите најблиски роднини на аеродромот Ротердам - Хаг.
