Српскиот претседател Вучиќ го информира шефот на дипломатијата на Данска за ситуацијата во Косово

БЕЛГРАД (АА) - Претседателот на Србија, Александар Вучиќ, денеска го информира министерот за надворешни работи на Кралството Данска, Ларс Леке Расмусен, за, како што наведе, „најопасниот развој на ситуацијата во Косово досега“, јавува Анадолу.

Вучиќ истакна дека последните случувања се последица на теророт што веќе подолго време се спроведувал врз тамошното српско население.

„Го повторив барањето безбедноста на северот на Косово да ја преземат припадниците на КФОР, кој има капацитет да спречи насилни акции на Приштина“, наведе Вучиќ.

Напоменувајќи дека Србија е подготвена да работи на продолжување на дијалогот со посредство на ЕУ, Вучиќ потсети дека Белград ги спровел сите свои обврски кои произлегуваат од Бриселскиот договор. Тој истакна дека кревкиот мир што постои се одржува благодарение на одмереноста на српскиот народ кој вложува натчовечки напори да се спротивстави на сите притисоци на режимот во Приштина.

„Претседателот Вучиќ особено го нагласи значењето од понатамошното меѓународно присуство на Косово и ги повика претставниците на меѓународната заедница да ги преземат сите неопходни мерки со цел да се спречат опасните и неодговорни потези на Приштина и да се заштити српското население во покраината, како и повлекување на припадниците на таканаречената специјална косовска полиција од северот на Косово“, соопштија од Службата за соработка со медиумите на претседателот на Србија.

Соговорниците разговарале и за членството на Србија во Европската Унија, а Вучиќ навел дека Србија ја цени поддршката на Данска и предложил започнување соработка во областа на стручното усовршување на државните службеници во рамките на европската интеграција.

Вучиќ со Расмусен разменил мислења за сите теми од заеднички интерес, меѓу кои и за интензивирање на економската и соработката во ИТ секторот, животната средина, биотехнологијата, културата и други области.