Dzihat Aliju
28 Јануари 2026•Ажурирај: 29 Јануари 2026
СКОПЈЕ (АА) - Возачите на камиони од Северна Македонија, Србија, Босна и Херцеговина и Црна Гора, кои на 26 јануари започнаа протести на граничните премини како реакција на новиот европски систем за управување со границите – системот за влез/излез (EES), трет ден по ред ги продолжуваат протестите на граничните премини во своите земји, јавува Анадолу.
Во соопштението објавено денес од „Макам-транс“, најголемото здружение на работодавачи на превозни трговски друштва во Северна Македонија, се наведува дека до решавање на проблемот, доколку одредени превозници превезуваат стока која може да се пропушти како лекови, жива стока и муниција и/или експлозив, потребно е да ја пратат целосната документација до нив за да им биде дозволено преминување на граничните премини.
Возачите на автобуси во меѓународниот превоз исто така укажаа на проблемите предизвикани од новиот систем на евиденција, упатувајќи апел до институциите на ЕУ, и истакнаа дека доколку не се донесе позитивна одлука, подготвени се да учествуваат во заеднички протести за заштита на меѓународниот транспорт и економијата.
Премиерот на Северна Македонија, Христијан Мицкоски, во изјава за локалните медиуми рече дека за прашањето кое е на агендата со Европската комисија од септември 2025 година, во најкраток рок ќе оствари средба со претседателката на Европската комисија, Урсула фон дер Лајен, со цел заедно со земјите од регионот да се изнајде решение што ќе им овозможи олеснување на превозниците.
Според информациите објавени во локалните медиуми, штетите предизвикани од блокадите достигнуваат околу 100 милиони евра дневно.
Додека се очекува протестите на камионџиите во земјите од регионот да продолжат во текот на целата недела, граничните премини за другите возила функционираат без проблеми.
Слични протести се одржуваат и на границите на други земји од Западен Балкан, односно во Србија, Црна Гора и Босна и Херцеговина.
Исто така, прекинат е сообраќајот на камионите на сите гранични премини меѓу Косово и Србија поради протестите што ги започнаа камионџиите на територијата на Србија.
