Холандија ја казни „УБС“ со околу 5 милиони долари поради улогата на „Кредит Свис“ во даночно затајување

Холандските обвинители ѝ изрекоа казна од 5 милиони евра на швајцарската банкарска групација „УБС“ поради улогата на „Кредит Свис“ во помагањето клиентите да ги скријат своите заштеди од даночните власти, објавија локалните медиуми денес, пренесува Анадолу.

Казната се однесува на „Кредит Свис“, која „УБС“ ја презеде во 2023 година, објави јавниот сервис НОС.

Обвинителите соопштија дека „Кредит Свис“ им помогнала на 12 холандски клиенти што во периодот од 2005 до 2015 година имале заштеди на сметки во швајцарски банки да ги скријат средствата од даночните власти.

Банката, наводно, им помагала на клиентите да отворат сметки, ја задржувала кореспонденцијата и им дозволувала да користат кодни имиња при комуникацијата со банкарските службеници.

Според обвинителите, „Кредит Свис“ со тоа била соучесник во поднесувањето на 80 неточни даночни пријави.

Холандската Служба за фискални информации и истраги, позната како ФИОД, во 2016 година започнала истрага под раководство на Јавното обвинителство.

Истрагата утврдила дека „Кредит Свис“ била вмешана во неточни даночни пријави поднесени од холандски иматели на сметки.

Властите соопштија дека се верува оти и други клиенти поднесувале неточни пријави, но одлучиле истрагата да ја ограничат на 12 случаи.

Во меѓувреме клиентите добиле дополнителни даночни решенија и казни.

„УБС“ се согласи да ја плати казната од 5 милиони евра, а обвинителите соопштија дека банката нема да се соочи со дополнителна кривична постапка во овој случај.