Бројот на стогодишници во Јапонија за првпат надмина 100.000

Бројот на луѓето на возраст од 100 или повеќе години во Јапонија за првпат надмина 100.000, објавија локалните медиуми денес, јавува Анадолу.

Бројот на 1 септември се зголемил за 7.914 во однос на претходната година, достигнувајќи рекордни 107.677 лица, што претставува 56-то последователно годишно зголемување, објави „Кјодо њуз“, повикувајќи се на податоци од Министерството за здравство, труд и социјална заштита.

Жените сочинуваат 87,6 отсто од стогодишниците во Јапонија.

Според „Кјодо“, уште 54.294 лица се очекува да наполнат 100 години во фискалната 2026 година, што е зголемување за 1.984 лица во споредба со претходната година.

Во Јапонија просечно има 87,51 стогодишник на 100.000 жители.

Фујо Кишимото, 114-годишна жителка на Кјото, родена на 20 декември 1911 година, е најстарата жена во Јапонија, додека 112-годишниот Хикару Като од Кумамото, роден на 2 мај 1914 година, е најстариот маж во земјата.

Јапонија во 1963 година, кога започнало собирањето на податоци, имала само 153 стогодишници. Бројот надминал 1.000 во 1981 година, 10.000 во 1998 година и 50.000 во 2012 година.

Просечниот животен век во Јапонија во 2025 година изнесувал 87,33 години за жените и 81,35 години за мажите.