İstanbul Photo Awards го објави жирито за 2026 година

İstanbul Photo Awards, престижен меѓународен натпревар за фотографии организиран од Анадолу, денес го објави составот на жирито за 2026 година, јавува Анадолу.

И оваа година натпреварот обединува истакнат панел на експерти, меѓу кои добитници на Пулицерова награда и Светска прес-фотографија, реномирани по својата работа во фотографии од категориите спорт, екологија, портрет и конфликт.

Меѓу истакнатите членови на жирито за 2026 година се фоторепортерката Керол Гузи, Јури Козирев од агенцијата НООР, Горан Томашевиќ, фоторепортер на „Глоуб енд мејл“, Ами Витале, фотограф и филмски автор на „Нешнл џиографик“, Камерон Спенсер, главен спортски фоторепортер на „Гети имиџис“, како и турските фоторепортери Ахмет Сел и Фират Јурдакул.

На жирито во 2026 година ќе му се придружат и Никол Тунг и Мухамед Мухејсен, двајца меѓународно признати автори познати по моќното визуелно раскажување.

Тунг е хонорарна фоторепортерка родена во Хонгконг, со седиште во Истанбул, која соработува со меѓународни медиуми, вклучително и „Њујорк тајмс“, како и со невладини организации. Нејзиното известување главно е фокусирано на Блискиот Исток, со посебен акцент на последиците за луѓето од конфликтите. За својата работа таа ја доби наградата „Филип Џонс Грифитс“ за 2025 година и беше финалист за Пулицеровата награда за фотографија од ударни вести.

Мухејсен е фотограф роден во Ерусалим и двократен добитник на Пулицерова награда.

Во изминатите две децении стекна меѓународно признание со долгорочната работа посветена на бегалците и принудната миграција. Неговиот живот и дело се тема на документарниот филм „Пронаоѓање на светлото“ на „Нешнл џиографик“, а тој е основач и на фондацијата „Секојдневни бегалци“.

Пријавувањето за натпреварот во 2026 година сѐ уште е отворено, а се прифаќаат фотографии во 10 категории, меѓу кои вести, спорт, природа и животна средина, секојдневен живот и портрет. Дозволени се поединечни фотографии и фотографии во серија.

Фотографите може да пријават до четири дела во категориите со поединечни фотографии и до две серии во категоријата серија фотографии при што секоја серија може да содржи најмногу 10 фотографии. Максималниот број на пријавени фотографии по учесник е 120.

Победниците на натпреварот, кој и оваа година е поддржан од „Турксел“ како комуникациски спонзор, ќе бидат избрани на онлајн седница на жирито во март 2026 година.

Повеќе информации за членовите на жирито и условите за пријавување се достапни на официјалната веб-страница: www.istanbulphotoawards.com.