Во историскиот ан „Јазмаџилар“ во турскиот град Токат и денес се практикува традиционалниот занает на рачно печатење мотиви врз ткаенина со дрвени калапи, пишува Анадолу.
Занаетчиите користат рачно издлабени дрвени калапи со различни мотиви, кои се нанесуваат врз ткаенината со боја. Покрај самото печатење, процесот вклучува и боење, перење и сушење, а секоја фаза се изведува внимателно за да се добие прецизен и траен отпечаток.
Техниката е позната како „јазмаџилик“ и претставува една од традиционалните текстилни уметности во Анадолија.
Според турските културни извори, занаетот во Токат има традиција долга неколку векови и особено се развил за време на Османлиското Царство.
Посебно место во процесот имаат дрвените калапи. Тие се изработуваат рачно, а мајсторите со мали резбарски алатки ги издлабуваат мотивите во дрвото. За различни бои може да се користат посебни калапи, кои потоа прецизно се нанесуваат еден по еден врз ткаенината.
Мотивите најчесто се инспирирани од природата, а меѓу традиционалните дезени се застапени цветови, лисја и гранки.
Во Токат со текот на времето се развиле и карактеристични локални мотиви, по кои печатените ткаенини се препознаваат.
Историскиот ан „Јазмаџилар“ е поврзан со развојот на овој занает во градот. Во неговите работилници традицијата продолжува да се одржува и денес.
Рачно печатените ткаенини се користат за изработка на различни производи, меѓу кои марами, шамии и други текстилни предмети. Занаетчиите истовремено ги пренесуваат техниките и знаењето на помладите генерации, со што се продолжува традицијата на „јазмаџилик“ во Токат.
contact_the_ombudsman
is_there_an_error_in_this_story
