Ердоган: „Велика Британија е важен и доверлив партнер на Турција“

ЛОНДОН (АА) - Турскиот претседател, Реџеп Таип Ердоган, денес изјави дека Турција има значително подобрена соработка во борбата против тероризмот со Велика Британија, отколку со механизмите на соработка со другите партнери на Анкара, јавува Anadolu Agency (AA).

Во рамките на официјалната посета на Лондон, Ердоган имaше обраќање на завршната сесија на 7. Форум Татли Дил кој има за цел зајакнување на билатералните односи меѓу Турција и Велика Британија.

Тој потсети дека станува збор за форум кој е основан во 2011 година додека беше премиер на Турција, а неговиот британски колега во тоа време беше Дејвид Камерун.

Форумот, во меѓувреме, се разви во престижна тинк-тенк организација во Лондон.

„Турција и Велика Британија негуваат односи кои досегнуваат 500 години во минатото“, рече Ердоган, додавајќи дека е особено благодарен на Велика Британија на изразената солидарност со Турција во јули 2016 година, кога се соочи со обидот за воен удар од страна на терористичката организација ФЕТО.

Турскиот претседател посебно ја истакна важноста на гестот на британскиот министер за односи со Европа и Америка, Алан Данкан, кој само три дена по обидот за државен удар ја посети Анкара и изрази поддршка на турските институции.

Ердоган додаде дека оваа посета била во периодот кога повеќето западни земји дури и не го осудија обидот за државен удар.

„Велика Британија е втор по големина пазар за извоз од Турција. Се надеваме дека оваа година ќе ја зголемиме трговската размена од 16 милијарди на 20 милијарди евра', рече Ердоган.

Укажувајќи на добрата билатерална соработка во областа на одбраната, Ердоган рече дека постои дополнителен потенцијал за голем успех ако се здружат турските оперативни и британските финансиски сили.

„Турција придава големо значење на зачувувањето на безбедноста во евроатлантскиот регион. Ние, исто така, работиме и на воспоставувањето одржлив мир на Блискиот Исток. Сакаме да придонесеме и помагаме во процесот на воспоставување мир во Сирија, Ирак, Авганистан и Сомалија, и нашата желба е да видиме заедничка борба против сите терористички организации“, порача Ердоган.

Турскиот претседател истакна дека терористичката организација ДЕАШ нанесува најголема штета на исламот и дека е голема грешка што некои таа терористичка организација ја нарекуваат „исламска држава“.

„Исламот во коренот на зборот значи мир и нашиот ислам е вера на мирот“, рече Ердоган, додавајќи дека Велика Британија ова прашање може да го разбере подобро од другите со оглед на мултикултурната традиција и големата муслиманска заедница што живее во неа.

За време на тридневната посета на Велика Британија, Ердоган ќе се сретне со британската кралица Елизабета Втора и со премиерката Тереза Мeј.

„Велика Британија е наш важен и доверлив партнер. Турција е подготвена на понатамошно унапредување на билатералната соработка во сите области и по излезот на Велика Британија од Европската Унија“, заклучи Ердоган.