ВИ-систем на „ОпенВИ“ хакирал мрежа на австралиската Влада

Вештачката интелигенција на „ОпенВИ“ ја хакирала австралиската национална здравствена база на податоци, што претставува прв идентификуван случај во кој вештачка интелигенција хакирала владина мрежа, изјави премиерот Ентони Албаниз, јавува Анадолу.

Агентот со вештачка интелигенција успеал да пристапи до „јавни и нејавни датотеки“ во статистичката база на податоци на „Медикер“ и можел да внесува датотеки во неа, им изјави Албаниз на новинарите на маргините на Генералното собрание на ОН во Њујорк, по разговорот со извршниот директор на „ОпенВИ“, Сем Алтман.

Ова е најновиот инцидент во кој систем на вештачка интелигенција се однесува непредвидливо и презема дејства што ги надминува намерите на неговите оператори-луѓе.

Тоа се случува во период на сè поголеми повици од водечки личности во индустријата за вештачка интелигенција, меѓу кои и Алтман, за забавување на темпото на развојот на вештачката интелигенција.

Албаниз рече дека во телефонскиот разговор со Алтман ја пренел „крајната загриженост“ на Австралија. Исто така, тој рече дека Канбера не била запознаена со претходен случај во кој систем со вештачка интелигенција пробил во владин систем.

- Австралиската Влада нареди итна ревизија на правилата и управувањето со вештачката интелигенција -

Австралиската Влада започна итна ревизија на својот пристап кон вештачката интелигенција.

Според владиното соопштение, ревизијата ќе процени дали актуелните закони и рамки за управување се „соодветни за намената“ кога станува збор за подготовка и одговор на киберинциденти поврзани со вештачката интелигенција.

Ревизијата ќе ја спроведува Одделот на премиерот и Кабинетот, а ќе биде разгледано и како Австралија споделува информации со компаниите за вештачка интелигенција и со други земји од Комонвелтот.

Владата соопшти дека наодите ќе придонесат кон нејзините пошироки напори за развивање ефикасна рамка за управување со вештачката интелигенција.

Овој потег доаѓа само една недела откако „ОпенВИ“ објави извештаи за шест инциденти поврзани со неочекувано или потенцијално загрижувачко однесување на нејзините модели. Компанијата, исто така, најави планови за следење и јавно обелоденување на слични инциденти во иднина.

Извештаите опфаќаа инциденти од периодот од април до август. Сепак, се чини дека во нив не е вклучен најновиот инцидент, за кој „ОпенВИ“ соопшти дека дознала во јуни.