Husamedin Gina
25 Октомври 2021•Ажурирај: 26 Октомври 2021
СКОПЈЕ (АА) – Претседателката на Државната комисија за спречување на корупцијата (ДКСК), Билјана Ивановска, истакна дека според последниот извештај на Европската комисија (ЕК) за напредокот на Северна Македонија, ДКСК е проактивна во превенција на корупцијата и во отворање на голем број на предмети, вклучително и на оние кои се однесуваат на високо ниво на службеници, јавува Агенција Анадолија (АА).
Државната комисија за спречување на корупцијата (ДКСК) на денешната прес-конференција се осврна на последниот извештај на Европската комисија (ЕК) за напредокот на Северна Македонија.
„Како во претходниот така и во овој извештај повторно се нотира напредокот во делот на борбата против корупцијата и судирот на интереси, оценувајќи дека Државната комисија за спречување на корупцијата е особено проактивна во превенција на корупцијата и во отворање на голем број на предмети, вклучително на оние кои се однесуваат на високо ниво на службеници“, нагласи Ивановска.
Ова е директна потврда, како што рече Ивановска, за оправданоста на активностите преземени во претходниот и ажурноста на Комисијата во овој состав кој со своето залагање за правилно разбирање на принципите и доследното владеење на правото направила сериозен исчекор во сегментот во кој работи.
„Со ваквата оценка Државната комисија за спречување на корупцијата (ДКСК) добива директна потврда за своето работење, но и дополнителен поттик во напорите да се задржи и зајакне интегритетот на институцијата и покрај обидите за дискредитација“, додаде Ивановска.
На новинарско прашање за какви обиди за дискредитација се работи и од чија страна, претседателката на ДКСК, не посочувајќи име рече дека медиумите се сведоци на сите случувања и на честите изјави на поединци во јавноста кои сакаат да ја дискредитираат работата на Комисијата.
За оваа година, како што соопшти Ивановска, во ДКСК се предвидени 16 нови вработувања, но, на барање на Министерството за финансии да се коригира нивниот план, скратени се две работни места, кои ќе успеат да се обезбедат следната година.
